परभणीतील गंगाखेड-परळी महामार्गावरील घटना...!
गंगाखेड (Parbhani Highway Accident) : तालुक्यात भरधाव वेगातील हायवाच्या धडकेत दुचाकीस्वार तरुण जागीच ठार झाल्याची घटना रविवार १९ एप्रिल रोजी रात्री उशिराने गंगाखेड ते परळी रस्त्यावरील वंदन पाटीवर घडली. यातील मयत तरुणाचे नाव अवधूत भास्कर शिंदे असे आहे.
याबाबत समजलेली अधिक माहिती अशी की, गंगाखेड शहरात कटींग सलूनचे दुकान चालवून रविवार १९ एप्रिल रोजी रात्री फॅशन प्रो दुचाकी क्रमांक एमएच २२ बीएल ३७२३ वरून निळा या गावाकडे निघालेल्या अवधूत भास्कर शिंदे वय २५ वर्ष रा. निळा ता. सोनपेठ याच्या दुचाकीला समोरून भरधाव वेगात येणाऱ्या हायवाची धडक बसल्याने दुचाकीवरील अवधूत शिंदे हा गंभीर जखमी होऊन बेशुद्ध झाला. त्याच्या पाठीमागे असलेल्या अनंत रघुनाथ शिंदे व गणेश सुग्रीव शिंदे यांनी (Parbhani Highway Accident) अपघाताची घटना पाहून निळा येथून घटनास्थळी चारचाकी वाहन बोलावून घेत बेशुद्ध अवस्थेतील अवधूत शिंदे यास मध्यरात्री १ वाजेच्या सुमारास गंगाखेड उपजिल्हा रुग्णालयात दाखल केले.
निवासी वैद्यकीय अधिकारी डॉ. पि.आर. चट्टे, परिचारिका माया लाटे, मंजुषा राख, गोविंद वडजे आदींनी तपासून त्यास मृत घोषित केले. याप्रकरणी राहुल भास्कर शिंदे यांनी दिलेल्या फिर्यादीवरून सोमवार २० एप्रिल रोजी सकाळी गंगाखेड पोलीस ठाण्यात एमएच २२ एए ६७७७ क्रमांकाच्या हायवा चालकाविरुद्ध गुन्हा दाखल करण्यात आला आहे. याचा पुढील तपास सपोनि आदित्य लोणीकर हे करीत आहेत.
