पातूर (Karala Shivar Murder Case) : पातूर पोलीस स्टेशनच्या हद्दीतील कारला शिवारात एका १७ वर्षीय युवकाची धारदार शस्त्राने वार करून हत्या करण्यात आल्याची धक्कादायक घटना घडली आहे. या घटनेमुळे संपूर्ण परिसरात प्रचंड खळबळ उडाली आहे. *यश गजानन गिरे* असे मृत पावलेल्या दुर्दैवी युवकाचे नाव आहे.
पहाटेच्या सुमारास घडली घटना
प्राथमिक माहितीनुसार, ही (Karala Shivar Murder Case) घटना आज सकाळी अंदाजे ५:०० ते ५:३० वाजण्याच्या सुमारास कारला शिवारातील सुधाकरराव नाईक आश्रमशाळेच्या गेटसमोर घडली. यश गिरे हा रक्ताच्या थारोळ्यात पडलेला असल्याचे काही नागरिकांच्या निदर्शनास आले.
उपचारापूर्वीच मृत्यू
नागरिकांनी तत्परता दाखवत यशला तातडीने उपचारासाठी आलेगाव येथील एका खाजगी रुग्णालयात नेले. मात्र, त्याची गंभीर प्रकृती पाहता पुढील उपचारासाठी त्याला तातडीने अकोला येथील शासकीय वैद्यकीय महाविद्यालयात (GMC) हलवण्यात आले. परंतु, दुर्दैवाने उपचारापूर्वीच त्याचा मृत्यू झाला होता.
तीन संशयितांनी केला हल्ला
प्राथमिक अंदाजानुसार, तीन युवकांनी मिळून धारदार शस्त्राने वार करत हा खून केल्याची चर्चा परिसरात सुरू आहे. (Karala Shivar Murder Case) घटनेची माहिती मिळताच उपविभागीय पोलीस अधिकारी गजानन पडघन, चान्नी पोलीस स्टेशनचे ठाणेदार दराडे, घुगे व पातूर पोलीस स्टेशनच्या कर्मचाऱ्यांनी तातडीने घटनास्थळाला भेट देऊन पाहणी केली.
पोलीस तपास सुरू
शवविच्छेदन: मृतदेहाचे अकोला येथील जीएमसी (GMC) मध्ये शवविच्छेदन करण्याची प्रक्रिया सुरू आहे.
गुन्हा दाखल: याप्रकरणी पातूर पोलीस स्टेशनमध्ये गुन्हा दाखल करण्याची प्रक्रिया सुरू असून, पुढील तपास पातूर पोलीस करत आहेत.
