यवतमाळ (Yavatmal Bar Association Protest) : गेल्या एक महिन्यापासून नीट परीक्षा घोटाळा प्रकरणात केंद्रीय शिक्षण मंत्री धर्मेंद्र प्रधान यांनी मंत्री पदाचा राजीनामा द्यावा या मागणीसाठी दिल्लीतील जंतर मंतर मैदानावर हजारों विद्यार्थ्यांच्या आंदोलनादरम्यान प्रशासन व पोलीसांनी लाठीचार्ज करीत गंभीर जखमी केले. या घटनेविरोधात निषेध व्यक्त करीत विद्यार्थ्यांच्या आंदोलनाला समर्थन दर्शविण्यासाठी यवतमाळ वकील संघाच्या वतीने शुक्रवार २४ जुलै रोजी जिल्हाधिकारी कार्यालयावर धडक देत जिल्हाधिकाऱ्यांना मागण्यांचे निवेदन देण्यात आले.
वकील संघाने केंद्रीय शिक्षण मंत्र्यांनी मंत्री पदाचा राजीनामा द्यावा, विद्यार्थ्यांवर अमानुष मारहाण करणाऱ्या पोलीसांवर तात्काळ कायदेशीर कारवाई व्हावी व उच्च स्तरीय समिती नेमून चौकशी करावी, विद्यार्थ्यांवर लावलेल्या केसेस मागे घ्याव्या व सरकारने विद्यार्थ्यांसोबत चर्चा करून विद्यार्थ्यांच्या मागण्या ऐकून घेवून त्यावर योग्य तो तोडगा काढावा.
तसेच नीट पेपर घोटाळ्यामुळे आत्महत्या केलेल्या विद्यार्थ्यांच्या कुटूंबांना शासकीय मदत, सदस्यांना शासकीय नौकरी द्यावी, नीट, जेईई तसेच इतर मोठया परिक्षा या शासनानेच घ्याव्यात व एनटिए संस्था रद्द करावी, अशा विविध मागण्या जिल्हाधिकाऱ्यांना दिलेल्या निवेदनाद्वारे करण्यात आल्या. यावेळी मोठ्या संख्येने यवतमाळ वकील संघाचे जेष्ठ वकील व इतर पदाधिकारी व सदस्य उपस्थित होते.
