मानवत तालुक्यातील घटनेने खळबळ; ढिगाऱ्याखाली अनेक जण अडकल्याची भीती, जखमींना रुग्णालयात हलविले
परभणी (Yashwandi Devasthan) : परभणी जिल्ह्यातील मानवत तालुक्यात असलेल्या यशवंडी देवसंस्था परिसरात शनिवारी मोठी दुर्घटना घडली. देवसंस्थेच्या सभागृहाचे छत अचानक कोसळल्याने परिसरात एकच खळबळ उडाली. प्राथमिक माहितीनुसार, सभागृहात बांधकामाचे काम सुरू असताना ही घटना घडली.
घटना घडली त्यावेळी सभागृह परिसरात भाविकांसह बांधकाम मजूरही उपस्थित होते. छत कोसळल्यानंतर अनेक जण ढिगाऱ्याखाली अडकल्याची भीती व्यक्त करण्यात येत आहे. या दुर्घटनेत अनेक जण जखमी झाल्याची माहिती समोर आली असून काही जणांचा मृत्यू झाल्याची शक्यताही व्यक्त केली जात आहे. मात्र, मृतांचा अधिकृत आकडा अद्याप जाहीर करण्यात आलेला नाही.
घटनेची माहिती मिळताच स्थानिक प्रशासन, पोलीस, महसूल विभाग तसेच आपत्ती व्यवस्थापन पथक तातडीने घटनास्थळी दाखल झाले. ढिगाऱ्याखाली अडकलेल्या नागरिकांचा शोध घेण्यासाठी युद्धपातळीवर बचावकार्य सुरू करण्यात आले आहे.
जखमींना तात्काळ जवळील रुग्णालयात उपचारासाठी दाखल करण्यात येत असून, बचाव पथकांकडून ढिगारा हटविण्याचे काम सुरू आहे.
या दुर्घटनेमुळे परिसरात हळहळ व्यक्त होत असून नागरिकांमध्ये चिंतेचे वातावरण निर्माण झाले आहे. दरम्यान, सभागृहाचे छत कोसळण्यामागील नेमके कारण काय, याचा शोध प्रशासनाकडून घेतला जात आहे. बचावकार्य पूर्ण झाल्यानंतर मृत आणि जखमींची अधिकृत संख्या स्पष्ट होणार आहे.
