गणेश पेठेतील डुल्या मारुती चौकातील घटना; वैभव साळुंखेविरोधात पोलिसांत गुन्हा दाखल
पुणे : वडापाव खरेदी करताना गर्दीत पायाला पाय लागल्याच्या क्षुल्लक कारणावरून झालेला वाद एका 28 वर्षीय तरुणाच्या जीवावर बेतला. पुण्यातील गणेश पेठ परिसरातील डुल्या मारुती चौकात हा प्रकार घडला. शिवम परदेशी असे मृत तरुणाचे नाव असून, त्याच्या मृत्यूप्रकरणी वैभव साळुंखे याच्याविरोधात पोलिसांनी गुन्हा दाखल केला आहे.
मिळालेल्या माहितीनुसार, शिवम परदेशी आणि वैभव साळुंखे हे दोघेही गणेश पेठ परिसरात वास्तव्यास असून त्यांची एकमेकांशी तोंडओळख होती. घटनेच्या दिवशी दोघेही डुल्या मारुती चौकातील वडापावच्या गाडीवर गेले होते. वडापाव घेण्यासाठी गर्दीत उभे असताना दोघांच्या पायांचा अनावधानाने स्पर्श झाला. याच किरकोळ प्रकारावरून त्यांच्यात वाद सुरू झाला.
वाद वाढल्यानंतर वैभव साळुंखे याने शिवमच्या छातीवर जोरदार मारहाण केल्याचा आरोप आहे. या मारहाणीत शिवमला गंभीर दुखापत झाली आणि त्याच्या शरीरात अंतर्गत रक्तस्त्राव झाला. प्रकृती गंभीर झाल्याने त्याला तातडीने रुग्णालयात उपचारासाठी दाखल करण्यात आले. मात्र, उपचार सुरू असतानाच शिवमचा मृत्यू झाला.
या घटनेमुळे गणेश पेठ परिसरात हळहळ व्यक्त होत आहे. क्षणिक संताप आणि किरकोळ कारणातून घडलेल्या या प्रकारामुळे नागरिकांमध्येही संतापाची भावना आहे.
दरम्यान, या घटनेतील आरोपी वैभव साळुंखे हा एका बिल्डरकडे अकाउंटंट म्हणून काम करतो. विशेष म्हणजे, शिवम आणि वैभव या दोघांच्याही वडिलांचा व्यवसाय रिक्षाचालकाचा आहे. सर्वसामान्य कुटुंबातील दोन तरुणांमधील किरकोळ वादाला गंभीर वळण लागल्याने परिसरात चर्चेला उधाण आले आहे. या प्रकरणाचा पुढील तपास पोलिसांकडून सुरू आहे.
