तुकाराम मुंढे यांच्या नेतृत्वाखाली अन्न व औषध प्रशासनाची धडक मोहीम सुरूच; गंभीर अनियमितता उघडकीस आल्यानंतर हॉटेल बंद, तेल व वनस्पती तुपाचे नमुने प्रयोगशाळेत पाठवले
FDA ची धडक कारवाई; प्रसिद्ध उपहारगृहावर टाळे
छत्रपती संभाजीनगर : राज्यभर अन्न सुरक्षा आणि भेसळविरोधी मोहिमेला वेग आलेला असताना अन्न व औषध प्रशासन (FDA) विभागाने छत्रपती संभाजीनगरातील प्रसिद्ध मे. उत्तम उपहार गृह या आस्थापनावर मोठी कारवाई केली आहे. तपासणीदरम्यान गंभीर अन्नसुरक्षा त्रुटी आढळल्याने एफडीएने थेट या आस्थापनाचा परवाना निलंबित करत हॉटेल सील केले आहे.
तुकाराम मुंढे यांच्या कार्यकाळात कारवाईला वेग
सनदी अधिकारी तुकाराम मुंढे यांनी अन्न व औषध प्रशासन विभागाचा पदभार स्वीकारल्यानंतर राज्यभर अवैध गुटखा, भेसळयुक्त अन्नपदार्थ, दूध भेसळ आणि नियमांचे उल्लंघन करणाऱ्या खाद्य व्यवसायांवर मोठ्या प्रमाणात कारवाई सुरू आहे. या मोहिमेअंतर्गत आता छत्रपती संभाजीनगरातील इमरतीसाठी प्रसिद्ध असलेल्या या उपहारगृहावरही धाड टाकण्यात आली.
तपासणीत धक्कादायक वास्तव उघड
एफडीएच्या अधिकाऱ्यांनी केलेल्या तपासणीत ग्राहकांच्या आरोग्याशी थेट संबंधित अनेक गंभीर बाबी समोर आल्या. मिठाई आणि इतर खाद्यपदार्थ तयार करताना वारंवार वापरलेले खाद्यतेल आणि वनस्पती तूप, अन्न तयार करण्याच्या जागेतील अस्वच्छता, झुरळांचा मुक्त वावर, ड्रेनेजजवळ उघड्यावर ठेवलेले इडलीचे पीठ, तंबाखूच्या पुड्या आणि भिंतींवर थुंकल्याच्या खुणा अशा अनेक त्रुटी निदर्शनास आल्या.
परवान्याबाबतही मोठा नियमभंग
तपासणीत असेही स्पष्ट झाले की, संबंधित आस्थापनाकडे रेस्टॉरंट प्रकारचा परवाना असताना प्रत्यक्षात मोठ्या प्रमाणात मिठाईचे उत्पादन केले जात होते. अशा प्रकारच्या उत्पादनासाठी स्वतंत्र उत्पादक परवाना आवश्यक असतानाही तो घेण्यात आला नव्हता.
निकृष्ट दर्जाचे तेल आणि वनस्पती तूप वापरल्याचा निष्कर्ष
समोसे आणि भजी तळण्यासाठी एकाच तेलाचा वारंवार वापर केला जात असल्याचे तपासात उघड झाले. तेलाच्या गुणवत्तेची तपासणी करताना TPC चाचणीत BR रीडिंग 58 इतके नोंदवले गेले, जे सुरक्षित मर्यादेपेक्षा लक्षणीय जास्त असल्याचे एफडीएने नमूद केले.
याशिवाय इमरती आणि जलेबी तयार करण्यासाठी वापरण्यात येणारे वनस्पती तूप (डालडा) देखील पुन्हा-पुन्हा वापरले जात असल्याचे आढळले. या तुपाचे BR रीडिंग 36 नोंदवण्यात आले.
अन्न तयार करण्याच्या जागेत अस्वच्छतेचे साम्राज्य
एफडीएच्या पाहणीत अन्न तयार करण्याच्या परिसरात झुरळांचा वावर दिसून आला. कीटकनाशक फवारणी (Pest Control) केल्याची कोणतीही नोंद उपलब्ध नव्हती. भिंतींवर जळमटे, काळपट तेलाचे थर आणि अस्वच्छ वातावरण आढळले. कचरापेटी झाकलेली नव्हती, तसेच खिडक्यांवर जाळ्या नसल्यामुळे स्वच्छतेचे नियम पाळले जात नसल्याचे स्पष्ट झाले.
कामगारांकडे वैद्यकीय प्रमाणपत्रांचा अभाव
तपासणीदरम्यान येथे कार्यरत असलेल्या 25 ते 30 कामगारांकडे मेडिकल फिटनेस सर्टिफिकेट नसल्याचे समोर आले. तसेच मिठाई तयार करण्यासाठी वापरल्या जाणाऱ्या Tartrazine या कृत्रिम खाद्य रंगाचा वापर किती प्रमाणात आणि कोणत्या पद्धतीने करायचा, याची माहिती संबंधित कामगारांनाही नसल्याचे अधिकाऱ्यांनी नोंदवले.
ड्रेनेजजवळ इडलीचे पीठ, तंबाखूच्या पुड्याही आढळल्या
एफडीएच्या पथकाला इडलीसाठी आंबवलेले पीठ ड्रेनेज लाईनलगत उघड्यावर ठेवलेले दिसले. समोसे आणि भजी तयार करण्याच्या ठिकाणी तंबाखू आणि चुन्याच्या पुड्या आढळल्या, तर भिंतींवर थुंकल्याच्या खुणाही दिसून आल्या. या सर्व बाबी अन्नसुरक्षेच्या नियमांचे गंभीर उल्लंघन असल्याचे एफडीएने नमूद केले.
परवाना निलंबित; नमुने प्रयोगशाळेत
या सर्व अनियमितता आणि अन्नसुरक्षेच्या गंभीर उल्लंघनांची नोंद घेत अन्न व औषध प्रशासन विभागाने संबंधित आस्थापनाचा परवाना तात्काळ निलंबित केला. हॉटेल सील करण्यात आले असून वापरलेल्या खाद्यतेल आणि वनस्पती तुपाचे नमुने प्रयोगशाळेत तपासणीसाठी पाठवण्यात आले आहेत. तपासणी अहवालानुसार पुढील कारवाई करण्यात येणार असल्याची माहिती विभागाकडून देण्यात आली.
