निगडीतील दुर्घटनेनंतर सुरक्षा व्यवस्थेवर प्रश्नचिन्ह; १५ ऑगस्ट २०२५ रोजी याच परिसरात तीन कंत्राटी कामगारांचा गुदमरून मृत्यू
पिंपरी-चिंचवड : निगडी परिसरातील भूमिगत डक्टमध्ये काम करताना गुदमरल्याने दोन तरुण कामगारांचा मृत्यू झाल्याची प्राथमिक माहिती समोर आली आहे. अमोल शिंदे (२०) आणि मनोज शिंदे (२६) अशी मृत कामगारांची नावे आहेत. एकाच ठिकाणी पुन्हा अशाच प्रकारची दुर्घटना घडल्याने कामगारांच्या सुरक्षेचा मुद्दा ऐरणीवर आला आहे.
मिळालेल्या माहितीनुसार, निगडी परिसरातील भूमिगत डक्टमध्ये काम करण्यासाठी हे दोन्ही कामगार उतरले होते. त्यावेळी गुदमरल्याने त्यांचा मृत्यू झाल्याचे प्राथमिक स्वरूपात सांगितले जात आहे. दुर्घटनेनंतर संबंधित यंत्रणांच्या सुरक्षा उपाययोजनांबाबत प्रश्न उपस्थित केले जात आहेत.
विशेष म्हणजे, १५ ऑगस्ट २०२५ रोजी याच परिसरात बीएसएनएलच्या ऑप्टिकल फायबर केबलचे काम करणाऱ्या तीन कंत्राटी कामगारांचा विषारी वायूमुळे गुदमरून मृत्यू झाला होता. त्या घटनेनंतर डक्टमध्ये उतरण्यापूर्वी आवश्यक सुरक्षा खबरदारी घेण्यात आली होती का, याबाबत प्रश्न उपस्थित झाले होते.
आता वर्षभराच्या कालावधीत त्याच ठिकाणी दोन वेगवेगळ्या दुर्घटनांमध्ये एकूण पाच कामगारांचा मृत्यू झाल्याचा दावा केला जात आहे. त्यामुळे पहिल्या दुर्घटनेनंतर सुरक्षा व्यवस्थेत नेमके कोणते बदल करण्यात आले, कामगारांना आवश्यक सुरक्षा साधने उपलब्ध करून देण्यात आली होती का आणि डक्टमध्ये विषारी वायूची तपासणी केली जात होती का, असे प्रश्न उपस्थित होत आहेत.
तसेच, कामाच्या ठिकाणी देखरेख आणि सुरक्षेची जबाबदारी असलेल्या अधिकाऱ्यांची भूमिका काय होती, याचाही तपास होण्याची मागणी केली जात आहे. वारंवार अशा घटना घडत असल्याने संबंधित यंत्रणांनी या प्रकरणाची सखोल चौकशी करून दोषींवर कठोर कारवाई करावी, अशी मागणी होत आहे.
दरम्यान, मृत कामगारांच्या कुटुंबीयांना तातडीने आर्थिक मदत देण्याची मागणीही करण्यात आली आहे. दुर्घटनेनंतर स्थानिक नागरिकांमध्ये रोष असून, या घटनेची सविस्तर चौकशी करण्याची मागणी जोर धरत आहे.
