गंगाखेड तालुक्यातील करम पाटीजवळील घटना; तिघांना पुढील उपचारासाठी नांदेडला हलविले
गंगाखेड (Travel Bus Crash) : पुणे येथून नांदेडकडे जाणारी खाजगी ट्रॅव्हल्स बस पलटी होऊन सात प्रवासी जखमी झाल्याची घटना गुरुवार (७ मे) रोजी सकाळी ८ वाजेच्या सुमारास गंगाखेड–परळी मार्गावरील करम पाटीजवळ घडली. सुदैवाने या अपघातात कोणतीही जीवितहानी झाली नाही.
याबाबत मिळालेल्या माहितीनुसार, पुणे येथून नांदेडकडे प्रवासी घेऊन जाणारी यशश्री ट्रॅव्हल्सची बस गंगाखेडकडे येत असताना रस्त्याखाली जाऊन पलटी झाली. या अपघातात सात प्रवासी जखमी झाले.
जखमींमध्ये लिला भानुदास वांजळे (वय ५० वर्ष), नितीन सदाशिव वाहुळे (वय ३२ वर्ष), ताई सदाशिव वाहुळे (वय ४५ वर्ष) सर्व रा. वारजे, पुणे; सयाबाई गणेश चव्हाण (वय ४५ वर्ष), गणेश काशीराम चव्हाण (वय ५० वर्ष) दोघे रा. मांडवा, ता. पुसद; निशांत निळकंठ वानखेडे (वय २६ वर्ष) रा. नांदेड व धुरपता अंगद हाके (वय २५ वर्ष) रा. उक्कडगाव यांचा समावेश आहे.
अपघाताची माहिती मिळताच खाजगी रुग्णवाहिका चालक रामेश्वर भालेराव, परमेश्वर भालेराव व हनुमान इंगळे यांनी तत्काळ घटनास्थळी धाव घेत जखमींना गंगाखेड उपजिल्हा रुग्णालयात दाखल केले.
उपजिल्हा रुग्णालयात निवासी वैद्यकीय अधिकारी डॉ. दिपक कातकडे, डॉ. केशव मुंडे, डॉ. पी. आर. चट्टे, डॉ. कैलास चांदकर तसेच परिचारिका मंजुषा राख, अश्विनी मुंडे, द्वारकादास बडे, भीमराव राठोड, प्रशांत राठोड आदींनी जखमींवर प्रथमोपचार केले. यापैकी तिघांची प्रकृती गंभीर असल्याने त्यांना पुढील उपचारासाठी नांदेड येथे हलविण्यात आले आहे.
दरम्यान, लांब पल्ल्याच्या प्रवासी वाहतूक करणाऱ्या खाजगी ट्रॅव्हल्स बसची प्रादेशिक परिवहन विभागाने नियमित तपासणी करावी, अशी मागणी नागरिकांकडून होत आहे.
