मानोरा : श्री संत सेवालाल महाराज तीर्थक्षेत्र विकास आराखड्यांतर्गत पोहरादेवी-उमरी येथे शासनाच्या निधीतून पूर्ण झालेले ‘नंगारा भवन व वास्तू संग्रहालय’ अद्यापही हस्तांतरणाच्या प्रतीक्षेत आहे. बांधकाम पूर्ण होऊनही ताबा न मिळाल्याने जिल्हा परिषद आणि पोहरादेवी ग्रामपंचायतीचे आर्थिक नुकसान होत असल्याचा आरोप करीत माजी पंचायत समिती सदस्य विजय पाटील यांनी दि. ७ ऑगस्ट रोजी मुख्य कार्यकारी अधिकारी यांना निवेदन दिले आहे.
निवेदनात विजय पाटील यांनी म्हटले आहे की, पोहरादेवी येथील नंगारा भवनाचे बांधकाम पूर्ण झाले असून ते हस्तांतरणासाठी तयार आहे. मात्र, अद्यापपर्यंत हस्तांतरणाची प्रक्रिया झालेली नाही. पीडब्ल्यूडीने हस्तांतरणाचे पत्र दिल्यानंतरही जिल्हा परिषद प्रशासनाकडून कोणतीही कार्यवाही झालेली नाही, असा दावा निवेदनातून करण्यात आला आहे.
त्यामुळे हे भवन सुरू न झाल्याने जिल्हा परिषद व ग्रामपंचायत पोहरादेवी यांचा महसूल बुडत असून शासनाचा निधीदेखील वाया जात असल्याचे निवेदनात नमूद करण्यात आले आहे. प्रशासनाने जातीने लक्ष घालून नंगारा भवन अर्थात ‘बंजारा विरासत वास्तू संग्रहालय, पोहरादेवी’ याच्या हस्तांतरणाची त्वरित प्रक्रिया करावी, अशी मागणी करण्यात आली आहे. त्यामुळे बंजारा समाजाच्या संस्कृतीचे जतन करणारे हे भवन लवकरात लवकर भाविकांसाठी खुले होईल, अशी आशा नागरिक व्यक्त करीत आहेत.
दरम्यान, गत वर्षभरापासून नंगारा विरासत म्युझियम संग्रहालयाची देखरेख अल्फा कंपनी व्यवस्थित करीत आहे. तसेच सर्व प्रकारची स्वच्छता व सुव्यवस्था शासनाच्या नियमानुसार आणि जिल्हा सहानियंत्रण समितीचे अध्यक्ष जिल्हाधिकारी यांच्या मार्गदर्शनाखाली व्यवस्थित सुरू असल्याचे रामदास हरिश्चंद्र खांडे, व्यवस्थापक, अल्फा कॉम सर्व्हिसेस इंडिया प्रा. लि. कंपनी यांनी स्पष्ट केले आहे.
