रेगडी येथे आठवड्यातून किमान दोन दिवस तलाठी देण्याची मागणी

तहसीलदारांनी दिले सकारात्मक आश्वासन..

घोट (Regdi Talathi Demand) : हळदवाही–रेगडी जिल्हा परिषद क्षेत्रातील नागरिकांची महसुली कामे सुलभ व्हावीत, यासाठी रेगडी येथे आठवड्यातून किमान दोन दिवस तलाठी उपस्थित करून दयावे अशी मागणी भाजप बंगाली आघाडीचे जिल्हाध्यक्ष सुरेश शहा यांनी चामोर्शीचे तहसीलदार प्रशांत घोरुडे यांना भेट घेऊन निवेदन दिले आहे. यावेळी तालुक्यातील विविध समस्यांवर चर्चा करण्यात आली.विशेषत रेगडी परिसरातील नागरिकांना तलाठी कार्यालयाच्या कामांसाठी वारंवार चकरा माराव्या लागत असल्याने त्यांचा वेळ आणि आर्थिक खर्च वाढत असल्याचे सुरेश शहा यांनी तहसीलदारांच्या निदर्शनास आणून दिले.

तसेच, रेगडी ग्रामपंचायतीतर्फे तलाठी कार्यालयासाठी स्वतंत्र जागा उपलब्ध करून देण्यात येणार असल्याने कार्यालयीन जागेची अडचणही दूर झाली असल्याचे त्यांनी सांगितले. त्यामुळे रेगडी येथे आठवड्यातून किमान दोन दिवस तलाठी बसविण्याची मागणी त्यांनी केली. यावर तहसीलदार घोरुडे यांनी सध्या SIR कार्यक्रम सुरू असल्याने महसूल विभाग त्यामध्ये व्यस्त असल्याचे सांगितले. हा कार्यक्रम पूर्ण झाल्यानंतर रेगडी येथे तलाठी नियमित बसविण्याबाबत आवश्यक कार्यवाही करण्यात येईल, असे सकारात्मक आश्वासन त्यांनी दिले.स्थानिक नागरिकांनी लवकरात लवकर रेगडी येथे तलाठी सेवा उपलब्ध करून नागरिकांची गैरसोय दूर करावी, अशी अपेक्षा व्यक्त केली आहे.