रुई शहाजानपूर येथील घटना; चार जणांविरोधात गुन्हा दाखल, मात्र आरोपी अद्याप फरार
बीड (Sword Attack) : बीड जिल्ह्यातील रुई शहाजानपूर येथे शेतीच्या मालकी आणि विक्रीच्या वादातून एक धक्कादायक प्रकार उघडकीस आला आहे. कौटुंबिक वादाने हिंसक वळण घेतल्याने पुतण्याने तलवारीने चुलत्यावर जीवघेणा हल्ला करत त्यांच्या हाताचे बोट छाटल्याची घटना घडली. याच हल्ल्यात चुलत भाऊही गंभीर जखमी झाला असून या घटनेचा थरारक व्हिडिओही समोर आला आहे.
मिळालेल्या माहितीनुसार, रामू सोपान घुमरे यांच्या मालकीची रुई शहाजानपूर येथे चार एकर शेती आहे. या जमिनीच्या विक्रीच्या मुद्द्यावरून घुमरे कुटुंबात आणि भावकीत दीर्घकाळापासून वाद सुरू होता. हा वाद अखेर टोकाला पोहोचल्यानंतर पुतण्या अतुल घुमरे याने तलवारीने रामू घुमरे यांच्यावर हल्ला करून त्यांच्या हाताचे बोट छाटले. तसेच चुलत भाऊ बाळासाहेब घुमरे यांच्यावरही तलवारीने वार करून त्यांना गंभीर जखमी केले.
हल्ल्यानंतर दोन्ही जखमींना तातडीने जिल्हा रुग्णालयासह एका खासगी रुग्णालयात उपचारासाठी दाखल करण्यात आले. मात्र त्यांची प्रकृती गंभीर असल्याने पुढील उपचारासाठी त्यांना छत्रपती संभाजीनगर येथील रुग्णालयात हलविण्यात आले. सुमारे आठवडाभर उपचार घेतल्यानंतर दोघांनाही घरी सोडण्यात आले.
२४ जून रोजी घडलेल्या या घटनेनंतर जखमींवर छत्रपती संभाजीनगर येथे उपचार पूर्ण झाल्यावर रात्री उशिरा बीड ग्रामीण पोलीस ठाण्यात चार जणांविरोधात गुन्हा नोंदविण्यात आला. मात्र गुन्हा दाखल होऊनही अद्याप कोणत्याही आरोपीला अटक करण्यात आलेली नाही. त्यामुळे संबंधित आरोपींना तातडीने अटक करून न्याय मिळावा, अशी मागणी जखमींच्या कुटुंबीयांनी केली आहे.
