मध्यरात्री २ वाजता बस पळवली; शहापूरजवळ रस्त्याच्या कडेला बस सोडून चोरटे पसार
जळगाव : जळगाव जिल्ह्यातील जामनेर आगारातून महाराष्ट्र राज्य मार्ग परिवहन महामंडळाची (ST) नवी कोरी बसच अज्ञात चोरट्यांनी पळवून नेल्याची धक्कादायक घटना समोर आली आहे. मध्यरात्री आगारातून बस चोरीला गेल्याने एसटी महामंडळासह परिसरात खळबळ उडाली आहे. दरम्यान, चोरी करून नेलेल्या बसचे शहापूर गावाजवळ एक चाक पंचर झाल्याने चोरट्यांचा डाव फसला.
मिळालेल्या माहितीनुसार, जामनेर आगारात उभी असलेली नवी कोरी एसटी बस अज्ञात चोरट्यांनी मध्यरात्री सुमारे २ वाजता पळवून नेली. बस आगारातून गायब झाल्याचे लक्षात येताच प्रशासनाची धावपळ उडाली. विशेष म्हणजे, बस चोरीची संपूर्ण घटना आगारातील सीसीटीव्ही कॅमेऱ्यात कैद झाली आहे. त्यामुळे चोरट्यांनी आगारातून बस नेण्यासाठी नेमकी कोणती पद्धत वापरली, याचा तपास आता पोलिसांकडून केला जात आहे.
पंचर झाल्याने चोरट्यांचा डाव फसला
आगारातून बस घेऊन पसार झाल्यानंतर चोरटे जामनेर तालुक्यातील शहापूर गावाजवळ पोहोचले. मात्र, याच ठिकाणी चोरीच्या बसचे एक चाक अचानक पंचर झाले. त्यामुळे चोरट्यांना बस पुढे नेता आली नाही. अखेर त्यांनी बस रस्त्याच्या कडेला सोडली आणि अंधाराचा फायदा घेत तेथून पळ काढला.
सकाळी बस पाहण्यासाठी ग्रामस्थांची गर्दी
शहापूर गावाजवळ रस्त्याच्या कडेला लालपरी उभी असल्याचे सकाळी नागरिकांच्या निदर्शनास आले. नवी कोरी एसटी बस असल्याने ती पाहण्यासाठी परिसरातील ग्रामस्थांनी मोठी गर्दी केली.
दरम्यान, थेट एसटी आगारातूनच मध्यरात्री बस चोरीला गेल्याने जामनेर एसटी आगाराच्या सुरक्षाव्यवस्थेवर गंभीर प्रश्नचिन्ह निर्माण झाले आहे. या प्रकरणी पोलिसांकडून पुढील तपास सुरू असून, बस पळवून नेणाऱ्या अज्ञात चोरट्यांचा शोध घेतला जात आहे.
