वाशिम : पुसद ते वाशिम मार्गावरील मानव विकास योजनेची एसटी बस मंगळवारी (दि. १४) सायंकाळी सुमारे ७.१५ वाजण्याच्या सुमारास येलदरी-खंडाळा घाटात धावत असताना अचानक इंजिनच्या बोनेटमधून धूर निघू लागला. चालकाच्या प्रसंगावधानामुळे मोठी दुर्घटना टळली.
मिळालेल्या माहितीनुसार, एमएच १४ बीटी ४५५० क्रमांकाची एसटी बस पुसदहून वाशिमकडे जात होती. चालक विजय श्रीराम मोरे यांनी धूर दिसताच तत्काळ बस रस्त्याच्या कडेला उभी केली. त्यानंतर वाहक अमोल किसन कानपुरे यांच्या मदतीने सर्व प्रवाशांना सुरक्षितपणे बसमधून खाली उतरविण्यात आले. या घटनेत कोणत्याही प्रवाशाला तसेच चालक-वाहकाला कोणतीही दुखापत झाली नाही.
दरम्यान, आगीमुळे बसची समोरील मोठी काच, केबिनच्या काचा, इंजिनचे बोनेट, चालकाच्या सीटजवळील स्टेअरिंग पाईपलाईन तसेच व्हिस्कस जळून अंदाजे दीड लाख रुपयांचे नुकसान झाल्याचा प्राथमिक अंदाज आहे.
घटनेची माहिती मिळताच पुसद अग्निशमन दलाने घटनास्थळी धाव घेत आग आटोक्यात आणली. अशी माहिती पुसद आगाराचे आगार व्यवस्थापक विवेक बनसोड यांनी दिली.
