चिखली (Shelgaon-Khandala Road) : मुख्यमंत्री महोदयांचे खाजगी सचिव विद्याधर महाले यांनी ७ जून रोजी शेलगाव जहागीर, खंडाळा व एकलारा परिसराचा दौरा करून ग्रामस्थांच्या समस्या जाणून घेतल्या. यावेळी ग्रामस्थांनी शेलगाव-खंडाळा व शेलगाव-पेनसावंगी या महत्त्वाच्या रस्त्यांच्या रखडलेल्या डांबरीकरणाचा प्रश्न त्यांच्या निदर्शनास आणून दिला. या तक्रारीची तात्काळ दखल घेत महाले यांनी सार्वजनिक बांधकाम विभागाच्या अधिकाऱ्यांना काम त्वरित सुरू करण्याचे निर्देश दिले.
शेलगाव जहागीर येथे ग्रामस्थांशी संवाद साधल्यानंतर महाले यांनी क्रांतिकारी शेतकरी संघटनेचे विनायक सरनाईक यांच्या निवासस्थानी सदिच्छा भेट दिली. यावेळी विनायक सरनाईक, सरपंच अरुण सरनाईक, ग्रामपंचायत सदस्य व ग्रामस्थांनी रस्त्यांच्या रखडलेल्या कामांबाबत सविस्तर माहिती दिली.
ग्रामस्थांनी सांगितले की, शेलगाव-खंडाळा व शेलगाव-पेनसावंगी या रस्त्यांच्या डांबरीकरणासाठी निधी मंजूर होऊनही गेल्या दोन महिन्यांपासून काम बंद आहे. ठेकेदाराने यंत्रसामग्री परत नेली असून डांबर उपलब्ध नसल्याचे कारण देत काम अर्धवट अवस्थेत सोडले आहे. त्यामुळे नागरिक, शेतकरी, विद्यार्थी तसेच रुग्णवाहिका सेवेला मोठ्या अडचणींचा सामना करावा लागत आहे.
यावेळी विनायक सरनाईक यांनी, “शेलगाव-पेनसावंगी रस्ता पूर्णपणे उखडलेला असून ठिकठिकाणी मोठे खड्डे पडले आहेत. पावसाळ्यापूर्वी काम पूर्ण न झाल्यास या भागातील दळणवळण व्यवस्था गंभीरपणे प्रभावित होईल,” अशी व्यथा मांडली.
ग्रामस्थांची कैफियत ऐकल्यानंतर विद्याधर महाले यांनी तात्काळ सार्वजनिक बांधकाम विभागाच्या कार्यकारी अभियंत्यांशी दूरध्वनीवर संपर्क साधून, “शेलगाव-खंडाळा व शेलगाव-पेनसावंगी या दोन्ही रस्त्यांचे रखडलेले डांबरीकरण पावसाळ्यापूर्वी पूर्ण करा व कामाच्या प्रगतीचा अहवाल सादर करा,” असे स्पष्ट निर्देश दिले.
महाले यांच्या या हस्तक्षेपामुळे ग्रामस्थांमध्ये समाधानाचे वातावरण निर्माण झाले आहे. अनेक दिवसांपासून प्रलंबित असलेल्या या प्रश्नाला गती मिळाल्याने नागरिकांनी आनंद व्यक्त केला.
आंदोलनाच्या इशाऱ्यानंतरही काम अर्धवट
शेलगाव-खंडाळा हा चिखली तालुक्याला जोडणारा प्रमुख मार्ग असून, शेलगाव-पेनसावंगी रस्ता शेतमालाच्या वाहतुकीसाठी अत्यंत महत्त्वाचा मानला जातो. यापूर्वी विनायक सरनाईक यांनी सातत्याने पाठपुरावा करत आंदोलनाचा इशारा दिल्यानंतर सुमारे तीन किलोमीटरपर्यंत काम करण्यात आले होते. मात्र उर्वरित काम अर्धवट सोडल्याने नागरिकांची गैरसोय कायम होती.
यावेळी क्रांतिकारी शेतकरी संघटनेचे विनायक सरनाईक, सरपंच अरुण सरनाईक, ग्रामपंचायत सदस्य, प्रतिष्ठित नागरिक व मोठ्या संख्येने ग्रामस्थ उपस्थित होते. भेटीदरम्यान विद्याधर महाले यांचा शाल, श्रीफळ व पुष्पगुच्छ देऊन सत्कार करण्यात आला.
