नगर परिषद रिसोड: 'जनगणना-२०२७' साठी यंत्रणा सज्ज; प्रगणक आणि पर्यवेक्षकांची 'फील्ड व्हिजिट' संपन्न
रिसोड ( Risod Census 2027) : देशाच्या आगामी 'जनगणना-२०२७' च्या पार्श्वभूमीवर जिल्हाधिकारी योगेश कुंभेजकर यांच्या मार्गदर्शनाखाली रिसोड नगर परिषद प्रशासन पूर्णपणे सक्रिय झाले असून, या प्रक्रियेसाठी आवश्यक असलेल्या प्रगणक व पर्यवेक्षकांच्या पहिल्या तुकडीचे तीन दिवसीय प्रशिक्षण शिबिर नुकतेच पार पडले. दिनांक २३ एप्रिल ते २५ एप्रिल २०२६ या कालावधीत नगर परिषद सभागृहात हे प्रशिक्षण आयोजित करण्यात आले होते. यावेळची जनगणना पूर्णपणे डिजिटल स्वरूपात होणार असून, नागरिकांच्या माहितीची गोपनीयता आणि सुरक्षितता राखण्याला सर्वोच्च प्राधान्य दिले जाणार आहे.
क्षेत्रीय भेट (Field Visit): प्रशिक्षणाच्या शेवटच्या दिवशी, २५ एप्रिल रोजी प्रगणक आणि पर्यवेक्षकांनी शहरातील शिक्षक कॉलनी आणि व्यंकटेश नगर भागात प्रत्यक्ष क्षेत्रीय भेट दिली. यावेळी प्रत्यक्ष घर गणना कशी करावी, याचे प्रात्यक्षिक घेण्यात आले. (Risod Census 2027) प्रात्यक्षिक कार्यादरम्यान स्थानिक नागरिकांनी उत्स्फूर्त प्रतिसाद देत प्रगणकांना आवश्यक माहिती पुरवून सहकार्य केले. क्षेत्रीय भेटीदरम्यान प्रत्यक्ष जमिनीवर काम करताना येणाऱ्या तांत्रिक अडचणी आणि त्यावर करावयाच्या उपाययोजनांबाबत क्षेत्रीय प्रशिक्षकांनी सखोल मार्गदर्शन केले. नगर परिषदेचे मुख्याधिकारी तथा चार्ज जनगणना अधिकारी सतिश शेवदा यांनी प्रत्यक्ष क्षेत्रीय कार्याचे निरीक्षण केले.
"जनगणना हे राष्ट्रहिताचे अत्यंत महत्त्वाचे काम आहे. डिजिटल प्रणालीमुळे कामात अचूकता येईल. सर्व प्रगणक आणि पर्यवेक्षकांनी या प्रशिक्षणाचा उपयोग करून हे कार्य गांभीर्याने पूर्ण करावे," अशा सूचना सतिश शेवदा यांनी यावेळी दिल्या. या प्रशिक्षण व क्षेत्रीय भेटीप्रसंगी नगर परिषदेचे प्रशासकीय अधिकारी तथा अतिरिक्त चार्ज जनगणना अधिकारी . शिवनंदन बरडे, क्षेत्रीय प्रशिक्षक दिपक बाजड व आनंद भावसार, जनगणना लिपिक रितेश इरतकर, तांत्रिक सहायक उमेश ढोमणे यांच्यासह नगर परिषदेचे इतर कर्मचारी उपस्थित होते.
