छत्रपती संभाजीनगर जिल्ह्यातील वैजापूर शहरात खाद्यपदार्थांच्या स्वच्छतेबाबत गंभीर प्रश्न निर्माण करणारी घटना समोर आली आहे. मिठाईच्या दुकानातून खरेदी केलेल्या कचोऱ्यांमध्ये उंदराच्या लेंड्या आढळल्याचा दावा ग्राहकाने केला आहे. विशेष म्हणजे, ग्राहकाने घेतलेल्या पाचही कचोऱ्यांमध्ये असा प्रकार आढळल्याने परिसरात खळबळ उडाली आहे. या घटनेमुळे खाद्यपदार्थांच्या दर्जासह दुकानातील स्वच्छता आणि सुरक्षिततेवरही प्रश्न उपस्थित झाले आहेत.
मिळालेल्या माहितीनुसार, एका ग्राहकाने मुलांसाठी कचोरी सेंटरमधून पाच कचोऱ्या खरेदी केल्या. घरी नेल्यानंतर कचोऱ्या उघडून पाहिल्या असता त्यामध्ये उंदराच्या लेंड्या आढळून आल्याचा त्याचा आरोप आहे. केवळ एका कचोरीत हा प्रकार नसून चार ते पाच कचोऱ्यांमध्ये उंदराच्या लेंड्या असल्याचे ग्राहकाने सांगितले.
धक्कादायक बाब म्हणजे, या कचोऱ्यांपैकी दोन कचोऱ्या मुलांनी खाल्ल्याचा दावाही ग्राहकाने केला आहे. त्यामुळे संभाव्य आरोग्यधोक्याबाबत कुटुंबीयांमध्ये चिंता निर्माण झाली आहे.
ग्राहकाने संबंधित कचोऱ्या दुकानात आणून दाखवल्या. त्यानंतर दुकानातील कर्मचाऱ्यांनी ते पार्सल फेकून दिल्याचे ग्राहकाचे म्हणणे आहे. मात्र, दुकानातून केलेल्या खरेदीचा पुरावा म्हणून त्याच्याकडे ऑनलाइन पेमेंटची पावती असल्याचेही त्याने सांगितले.
ग्राहकाच्या म्हणण्यानुसार, दुकानदाराने झालेली चूक मान्य केली आहे. मात्र, या प्रकाराची तक्रार करण्याचा निर्णय ग्राहकाने घेतला आहे. त्यामुळे आता अन्न व औषध प्रशासन (FDA) या प्रकरणाची दखल घेते का आणि संबंधित मिठाई दुकानावर कोणती कारवाई केली जाते, याकडे नागरिकांचे लक्ष लागले आहे.
तुकाराम मुंढेंच्या कारवाईकडे लक्ष
दरम्यान, तुकाराम मुंढे यांनी अन्न व औषध प्रशासन विभागाची सूत्रे हाती घेतल्यानंतर राज्यातील खाद्यपदार्थांच्या गुणवत्तेबाबतच्या कारवाईला वेग आल्याचे चित्र आहे. गेल्या काही दिवसांपासून FDA ची पथके राज्यातील विविध भागांमध्ये नियमितपणे तपासणी आणि धडक कारवाई करत आहेत.
या कारवायांमध्ये भेसळयुक्त किंवा नियमांचे उल्लंघन करणारे खाद्यपदार्थ आढळल्यास ते नष्ट केले जात आहेत. तसेच संबंधित आस्थापनांविरोधात परवाना रद्द करण्यासह कारवाई केली जात असल्याचे चित्र आहे. या मोहिमेत मोठ्या आणि प्रसिद्ध खाद्यपदार्थांच्या ब्रँड्सवरही कारवाई करण्यात आल्याने व्यावसायिकांमध्ये प्रशासनाच्या कारवाईची चर्चा आहे.
राज्यातील नागरिकांकडूनही अन्नपदार्थांच्या गुणवत्तेबाबत कठोर कारवाईची मागणी होत आहे. वैजापूरमधील कचोरी प्रकरणातही FDA कडून तपासणी किंवा कारवाई होते का, याकडे आता सर्वांचे लक्ष लागले आहे.
