२६ ऑगस्टला नानापेठेतून ईदची भव्य मिरवणूक; मुख्य मार्ग आणि जोडरस्त्यांपासून १०० मीटरपर्यंत पार्किंगला बंदी
पुणे : ईद सणाच्या पार्श्वभूमीवर पुणे शहरात उद्या, बुधवार २६ ऑगस्ट २०२६ रोजी नानापेठ परिसरातून भव्य मिरवणूक काढण्यात येणार आहे. मिरवणुकीदरम्यान वाहतूक कोंडी होऊ नये आणि नागरिकांना अडचणींचा सामना करावा लागू नये, यासाठी पुणे पोलीस वाहतूक शाखेने शहरातील काही प्रमुख मार्गांवर तात्पुरते वाहतूक बदल लागू केले आहेत.
मिरवणुकीच्या मार्गावर वाहनांचे पार्किंग रोखण्यासाठी विशेष निर्बंधही घालण्यात आले आहेत. मुख्य मिरवणूक मार्ग तसेच त्याला जोडणाऱ्या रस्त्यांच्या तोंडापासून १०० मीटरपर्यंत कोणत्याही वाहनाला पार्किंग करता येणार नाही. नियमांचे उल्लंघन करणाऱ्या वाहनांवर पोलिसांकडून कारवाई केली जाणार आहे.
नानापेठ ते सिटी जामा मस्जिद असा मिरवणुकीचा मार्ग
ईदची मिरवणूक सकाळी नानापेठेतील मनुशाह मस्जिद येथून सुरू होईल. पुढे संत कबीर चौक, ए.डी. कॅम्प चौक, भारत सिनेमा, पद्मजी पोलीस चौकी चौक, निशांत सिनेमा, भगवानदास चाळ, चुडामन तालीम, मुफ्ती फौज चौक, सरदार पटेल रोड, कुरेशी मस्जिद आणि जान मोहम्मद स्ट्रीट या मार्गाने मिरवणूक पुढे जाईल.
त्यानंतर बाबाजान दर्गाह, चारबावडी चौकी, फुलवाला गल्ली, सेंटर स्ट्रीट रोड, भोपळे चौक, १५ ऑगस्ट चौक, एम.जी. रोड, महमद रफी चौक, कोहीनूर चौक, महावीर चौक, सेंटर स्ट्रीट पोलीस चौकी चौक, सरबतवाला चौक आणि क्वार्टर गेट असा पुढील मार्ग असेल.
यानंतर मिरवणूक संत कबीर चौक, नाना चावडी चौक, अल्पना सिनेमा, हमजेखान चौक, गोविंद हलवाई चौक आणि सुभानशाह दर्गा चौक मार्गे शुक्रवार पेठेतील सिटी जामा मस्जिद येथे पोहोचेल. येथे मिरवणुकीची सांगता होणार आहे.
वाहतुकीसाठी कोणते पर्यायी मार्ग?
रास्ता पेठ ते संत कबीर चौक: या दिशेची वाहतूक समर्थ पोलीस स्टेशन आणि क्वार्टर गेटमार्गे वळवण्यात येणार आहे.
नाना पेठ ते लक्ष्मी रोड: नाना चावडी चौकातून वाहने रास्ता पेठ-पॉवर हाऊस मार्गे पुढे सोडली जातील.
कॅम्प आणि एम.जी. रोड: वाय जंक्शनवरून एम.जी. रोडच्या दिशेने जाणारी वाहतूक बंद करून खाणे मारुती चौकाकडे वळवण्यात येईल.
इस्कॉन मंदिर ते अरोरा टॉवर: सकाळी ९ वाजल्यापासून परिस्थितीनुसार डॉ. बाबासाहेब आंबेडकर पुतळ्याकडे जाणारी वाहतूक थांबवून पर्यायी मार्गाने वळवली जाणार आहे.
व्होल्गा चौक ते महमद रफी चौक: या मार्गावरील वाहतूक बंद करून ईस्ट स्ट्रीट रोडमार्गे इंदिरा गांधी चौकाच्या दिशेने वळवण्यात येईल.
परिस्थितीनुसार वाहतुकीत आणखी बदल
मिरवणूक ज्या पद्धतीने पुढे सरकेल, त्यानुसार स्थानिक परिस्थितीचा आढावा घेऊन वाहतुकीत आवश्यक ते अतिरिक्त बदल केले जाणार आहेत. त्यामुळे वाहनचालकांनी मिरवणुकीच्या मुख्य मार्गाचा वापर टाळून पोलिसांकडून सुचवण्यात आलेल्या पर्यायी मार्गांचा अवलंब करावा, असे आवाहन करण्यात आले आहे.
नागरिकांनी वाहतूक पोलिसांना सहकार्य करावे आणि नो-पार्किंगच्या नियमांचे पालन करावे, असे पोलीस आयुक्त पी. आर. पाटील यांनी सांगितले आहे.
