पोलिसांची ४ बेस आणि ४ टॉप स्पीकरची मर्यादा; बिबवेवाडीतील श्रीकृष्ण तरुण मंडळाची साऊंड सिस्टिम जप्त
पुण्यात दहीहंडी उत्सवाच्या पार्श्वभूमीवर DJच्या आवाजाचा मुद्दा पुन्हा चर्चेत आला आहे. गणेशोत्सवात DJवर बंदी घालण्याची मागणी करणाऱ्या विद्यानंद बापट या तरुणाला अनेक पुणेकरांचा पाठिंबा मिळत असतानाच, आता दहीहंडी उत्सवातील ध्वनीप्रदूषणाविरोधात पोलिसांनी कारवाई केली आहे. बिबवेवाडी परिसरातील एका दहीहंडी मंडळावर नियमांचे उल्लंघन केल्याप्रकरणी गुन्हा दाखल करण्यात आला असून, पुण्यातील दहीहंडी उत्सवातील ही पहिली कारवाई ठरली आहे.
बिबवेवाडी ओटा परिसरातील श्रीकृष्ण तरुण मंडळाने दहीहंडी कार्यक्रमासाठी पोलिसांकडून पारंपरिक वाद्य वापरण्याची परवानगी घेतली होती. मात्र, लाऊडस्पीकरसंदर्भातील पोलिसांच्या लेखी आदेशाचे उल्लंघन करत मंडळाने निर्धारित मर्यादेपेक्षा अधिक साऊंड सिस्टिमचा वापर केला.
पोलिसांच्या नियमानुसार लाऊडस्पीकरसाठी ४ बेस आणि ४ टॉप स्पीकर वापरण्याची परवानगी होती. मात्र मंडळाकडून ८ बेस आणि ८ टॉप स्पीकर लावण्यात आले. त्यामुळे परिसरात ध्वनीप्रदूषण झाल्याची तक्रार निर्माण झाली आणि नागरिकांना त्रास सहन करावा लागला. या प्रकरणाची दखल घेत पोलिसांनी मंडळावर गुन्हा दाखल करत साऊंड सिस्टिम जप्त केली.
राहुल प्रकाश जगताप हे श्रीकृष्ण तरुण मंडळाचे अध्यक्ष आहेत. यंदाच्या दहीहंडी उत्सवात ध्वनीप्रदूषणाच्या नियमांचे उल्लंघन केल्याप्रकरणी गुन्हा दाखल झालेले हे पहिले मंडळ आहे.
दरम्यान, पुणे पोलिस आयुक्त अमितेश कुमार यांनी यापूर्वीच ध्वनीप्रदूषणाबाबत स्पष्ट इशारा दिला होता. दहीहंडी आणि आगामी गणेशोत्सवाच्या पार्श्वभूमीवर लाऊडस्पीकरच्या वापरासाठी ४ बेस आणि ४ टॉप यांनाच परवानगी दिली जाणार असल्याचे त्यांनी सांगितले होते. या मर्यादेपेक्षा अधिक स्पीकर लावून ध्वनीप्रदूषण केल्यास संबंधितांवर कायदेशीर कारवाई केली जाईल, असा इशाराही पोलिसांनी दिला होता.
त्यामुळे दहीहंडी उत्सवात झालेल्या या पहिल्या कारवाईनंतर आगामी गणेशोत्सवात DJ आणि ध्वनीप्रदूषणाच्या नियमांची अंमलबजावणी किती कडकपणे केली जाते, याकडे पुणेकरांचे लक्ष लागले आहे.
