पातुर (Go mata Samman Rally) : गोवंश रक्षण व संवर्धनाबाबत जनजागृती तसेच गोहत्याबंदी संदर्भात कठोर कारवाईची मागणी करत “गोमाता सन्मान आवाहन अभियान” अंतर्गत पातुर येथे भव्य रॅलीचे आयोजन करण्यात आले. या रॅलीला गोभक्त नागरिकांचा उत्स्फूर्त प्रतिसाद मिळाला. महाराष्ट्रासह संपूर्ण देशभर सुरू असलेल्या या अभियानाच्या पार्श्वभूमीवर पातुर तहसील कार्यालयावर निवेदन सादर करण्यात आले. मोठ्या संख्येने गोभक्त, महिला, सामाजिक कार्यकर्ते तसेच विविध गोशाळांचे संचालक या रॅलीत सहभागी झाले होते. महिलांनीही उत्साहाने सहभाग नोंदवत गोमातेप्रती आपले प्रेम व्यक्त केले.
रॅलीदरम्यान संत-महंतांनी कीर्तनाच्या माध्यमातून गोसंवर्धनाचे महत्त्व पटवून देत जनजागृती केली. “गोमाता ही देशाच्या अर्थव्यवस्थेचा कणा असून शेतकऱ्यांच्या उन्नतीसाठी तिचे संरक्षण आवश्यक आहे,” असा संदेश यावेळी देण्यात आला. तसेच गोहत्याबंदीबाबत अधिक कठोर कायदे करण्याची मागणीही करण्यात आली. रॅलीत घोषणाबाजी करत तहसील कार्यालयावर मोर्चा काढण्यात आला आणि प्रशासनाला निवेदन देण्यात आले. “जोपर्यंत गोमातेला ‘राष्ट्रमाता’चा दर्जा दिला जात नाही, तोपर्यंत हे अभियान सुरूच राहील,” असा निर्धार यावेळी गोभक्तांनी व्यक्त केला.
ही (Go mata Samman Rally) रॅली यशस्वी करण्यासाठी सकल हिंदू समाज, गोभक्त, गोशाळा संचालक व जागरूक नागरिकांनी मोठ्या प्रमाणात सहभाग नोंदवला. भविष्यातही असे आंदोलन सुरू राहील, असा विश्वास आयोजकांनी व्यक्त केला.
