राणीसावरगावातील फुगणरवाडी रस्त्यावर स्थागुशा पथकाची कारवाई; तिघांना ताब्यात, तिघे फरार
परभणी : गंगाखेड तालुक्यातील पिंपळदरी पोलीस ठाण्याच्या हद्दीतील राणीसावरगाव येथे ‘तिर्रट’ नावाचा जुगार खेळणाऱ्यांवर स्थानिक गुन्हे शाखेच्या पथकाने छापा टाकला. या कारवाईत रोख रकमेसह ६ दुचाकी आणि ३ मोबाईल असा एकूण ३ लाख ३५ हजार ४५० रुपयांचा मुद्देमाल जप्त करण्यात आला. या प्रकरणी सहा जणांविरुद्ध पिंपळदरी पोलीस ठाण्यात गुन्हा दाखल करण्यात आला आहे.
स्थानिक गुन्हे शाखेचे पोलीस निरीक्षक गजेंद्र सरोदे आणि सहायक पोलीस निरीक्षक जायभाये यांच्या मार्गदर्शनाखाली स्थागुशाचे पथक पिंपळदरी पोलीस ठाण्याच्या हद्दीत गस्तीवर होते. यावेळी पथकाला राणीसावरगाव येथील फुगणरवाडी रस्त्यावर पत्त्यावर पैसे लावून अवैधरित्या आणि बेकायदेशीरपणे ‘तिर्रट’ नावाचा जुगार खेळला जात असल्याची माहिती मिळाली.
त्यानुसार पोलीस उपनिरीक्षक गणेश सवंडकर, पोलीस हवालदार महेश कवठाळे, पोलीस हवालदार राहुल परसोडे, पोलीस हवालदार सचिन भदर्गे, पोलीस हवालदार माणिक वाघ आणि पोलीस शिपाई दिलीप निलपत्रेवार यांच्या पथकाने शनिवारी, २२ ऑगस्ट रोजी संबंधित ठिकाणी छापा टाकला.
या कारवाईदरम्यान फारुख खाजा मिया शेख, विलास यादवराव जाधव आणि विकास प्रकाश चाफाकानडे यांना ताब्यात घेण्यात आले. तर वसीम बाबू सय्यद, दयानंद संभाजी हाके आणि खलील मनोद्दीन शेख हे तिघे फरार झाले.
पथकाने रोख रकमेसह ६ दुचाकी आणि ३ मोबाईल असा एकूण ३ लाख ३५ हजार ४५० रुपयांचा मुद्देमाल जप्त केला. या प्रकरणात सहा जणांविरुद्ध पिंपळदरी पोलीस ठाण्यात गुन्हा दाखल करण्यात आला आहे.
या प्रकरणाचा पुढील तपास सहायक पोलीस निरीक्षक दिपाली गित्ते यांच्या मार्गदर्शनाखाली पिंपळदरी पोलीस करीत आहेत.
