पोहेटाकळी शिवारातील राष्ट्रीय महामार्ग ६१ वरील घटना
परभणी (NH61 Accident) : परभणीच्या पाथरी तालुक्यातील पोहेटाकळी शिवारात राष्ट्रीय महामार्ग क्रमांक ६१ वर रविवारी पहाटे चार वाजण्याच्या सुमारास एका कारचा अपघात होऊन दोन जण जखमी झाल्याची घटना घडली आहे. मिळालेल्या माहितीनुसार मराठा आरक्षण आंदोलनाचे नेते मनोज जरांगे पाटील यांच्या आंतरवाली सराटी येथील उपोषणाला पाठिंबा देण्यासाठी अपघातग्रस्त गाडीतील मराठा बांधव गेले होते. तेथून रविवार ३१ मे रोजी पहाटे ३.३० ते ४ वा. सुमारास
आपल्या गावाकडे परत येत असताना पोहेटाकळी शिवारातील कृषी महाविद्यालय व डाव्या कालव्याजवळ राष्ट्रीय महामार्गावर त्यांची एमएच २२ एडब्ल्यू ५५७६ क्रमांकाची कार अनियंत्रित होऊन रस्त्याच्या खाली जाऊन पलटी झाली.
या अपघातात वाहनातील पाच प्रवाशांपैकी दोघांना दुखापत झाली. जखमींना काही नागरीकांनी तातडीने उपचारासाठी पाथरी शहरातील वरद हॉस्पिटलमध्ये दाखल करण्यात आले. यापैकी गजानन आहेर यांची प्रकृती गंभीर असल्याने त्यांना पुढील उपचारासाठी परभणी येथे हलविण्यात आल्याची माहिती मिळाली आहे.
अपघाताचे नेमके कारण समजू शकले नसून पहाटेच्या वेळी चालकाचा वाहनावरील ताबा सुटल्याने हा अपघात झाल्याचा प्राथमिक अंदाज व्यक्त करण्यात येत आहे.
