५.५६ कोटी रुपयांच्या फसवणुकीप्रकरणी पूर्णा पोलिस ठाण्यात दोघांविरुद्ध गुन्हा; १०० ते १५० शेतकरी आर्थिक फसवणुकीचे बळी
परभणी : परभणी जिल्ह्यातील पूर्णा तालुक्यातील एरंडेश्वर परिसरात शेतकऱ्यांची कोट्यवधी रुपयांची फसवणूक झाल्याचा प्रकार समोर आला आहे. शेतकऱ्यांचा विश्वास संपादन करून विविध प्रकारचा शेतमाल खरेदी करणाऱ्या व्यापाऱ्याने त्याची रक्कम न देता फरार झाल्याची घटना घडली आहे. या प्रकरणी ५ कोटी ५६ लाख ४९ हजार रुपयांच्या फसवणुकीचा गुन्हा पूर्णा पोलिस ठाण्यात नोंद करण्यात आला आहे.
या प्रकरणी रामप्रसाद साहेबराव काळे यांनी फिर्याद दाखल केली आहे. त्यानुसार शेख हमीद उर्फ अमित शेख सरू आणि शेख सरू शेख बालेसार यांनी झिरोफाटा येथील जय किसान ट्रेडिंग कंपनी या आडत दुकानाच्या माध्यमातून १ ऑक्टोबर २०२३ ते ३० मे २०२६ या कालावधीत शेतकऱ्यांकडून हळद, हरभरा, सोयाबीन, गहू आणि तूर यांसह विविध धान्याची खरेदी केली.
खरेदी केलेल्या शेतमालाची एकूण किंमत ५ कोटी ५६ लाख ४९ हजार रुपये असून, शेतकऱ्यांनी वारंवार मागणी करूनही संबंधित व्यापाऱ्यांनी पैसे देण्यास टाळाटाळ केली. त्यानंतर दोन्ही व्यापारी गाव आणि घर सोडून पसार झाले असून त्यांचे मोबाईल फोनही बंद असल्याचे फिर्यादीत नमूद करण्यात आले आहे.
फसवणुकीचा प्रकार उघडकीस आल्यानंतर परिसरातील सुमारे १०० ते १५० शेतकऱ्यांनी पूर्णा पोलिस ठाण्यात धाव घेत तक्रार दाखल केली. या प्रकरणी दोघांविरुद्ध गुन्हा नोंद करण्यात आला असून पुढील तपास सपोनि. पाटील करत आहेत.
