तख्त श्री हजूर साहिब गुरुद्वाराजवळ घडली घटना; हल्ल्याचा उद्देश तपासण्याचे मुख्यमंत्र्यांचे निर्देश
नांदेड : शिरोमणी अकाली दलाचे (SAD) प्रमुख आणि पंजाबचे माजी उपमुख्यमंत्री सुखबीर सिंह बादल यांच्यावर नांदेडमध्ये हल्ला झाल्याची घटना समोर आली आहे. तख्त श्री हजूर साहिब गुरुद्वाराजवळ ही घटना घडली. हल्ल्यानंतर बादल यांना रुग्णालयात दाखल करण्यात आल्याची माहिती आहे. दरम्यान, या घटनेप्रकरणी पोलिसांनी आरोपीला तातडीने ताब्यात घेतले असून हल्ल्यामागील नेमका उद्देश काय होता, याचा तपास सुरू आहे.
हल्ल्यानंतरचा एक व्हिडिओही समोर आला आहे. या व्हिडिओमध्ये सुखबीर सिंह बादल यांना एका इमारतीच्या दिशेने नेत असल्याचे दिसून येते. तसेच त्यांच्या उजव्या हाताला कापड बांधलेले असल्याचेही दिसत आहे. मिळालेल्या माहितीनुसार, बादल यांची प्रकृती स्थिर आहे.
हल्ला करणाऱ्या हल्लेखोराची ओळख पटली आहे. नांदेडचे पोलीस अधीक्षक एसपी रोहन नीलाभ यांनी दिलेल्या माहितीनुसार, सुखबीर सिंह यांच्यावर हल्ला करणाऱ्या हल्लेखोराचे नाव जसपाल सिंह असे आहे. जसपाल सिंह हा एक वयोवृद्ध माणूस आहे. घटनेनंतरचा त्याचा एक व्हिडिओही समोर आला आहे. हल्ल्यानंतर झालेल्या झटापटीत त्याची पगडी सुटली. व्हिडिओमध्ये एक व्यक्ती जसपालची पगडी बांधताना दिसत असून हा व्हिडिओ हल्ल्यानंतरचा असल्याचे सांगितले जात आहे.
सुखबीर सिंह बादल यांच्यावर हल्ला करणारा हल्लेखोर हा लॉ (LAW) चे शिक्षण झाले असल्याचे सांगत आहे. अटकेनंतर आरोपीने सांगितले की, त्याने पुण्यातून वकिलीचे शिक्षण घेतले आहे. सुखबीर सिंह बादल यांनी पंजाबला उडता पंजाब बनवले, ज्यामुळे मी प्रचंड संतापात होतो. पंजाबमध्ये वाढत्या अंमली पदार्थांमुळे आपण रागात होतो. यामुळे त्याने हे कृत्य केल्याचे बोलले जात आहे.
सुखबीर सिंह बादल हे त्यांच्या पत्नी आणि खासदार हरसिमरत कौर बादल यांच्यासोबत नांदेडमधील तख्त श्री हजूर साहिब येथे गेले होते. त्याचवेळी गुरुद्वारा परिसरात त्यांच्यावर हल्ला झाल्याची माहिती समोर आली.
या घटनेची माहिती मिळताच महाराष्ट्राचे मुख्यमंत्री देवेंद्र फडणवीस यांनी नांदेडच्या पोलीस अधीक्षकांकडून संपूर्ण घटनेचा आढावा घेतला. हल्लेखोराला अटक करण्यात आली असून त्याने कोणत्या हेतूने हा हल्ला केला, याचा सखोल तपास करण्याच्या सूचना मुख्यमंत्र्यांनी पोलिसांना दिल्या आहेत.
देवेंद्र फडणवीस यांनी सुखबीर सिंह बादल यांच्याशी दूरध्वनीवरून संवाद साधत त्यांच्या प्रकृतीची विचारपूस केली. बादल यांची प्रकृती चांगली असल्याची माहिती यावेळी समोर आली आहे.
दरम्यान, राज्याचे गृहराज्यमंत्री डॉ. पंकज भोयर यांनीही या प्रकरणावर प्रतिक्रिया दिली आहे. ते म्हणाले की, घटना नुकतीच घडली असून त्याबाबतची संपूर्ण माहिती घेतली जाईल. आपण पक्षाच्या बैठकीसाठी भंडाऱ्यात उपस्थित असल्याचे त्यांनी सांगितले. घटनेची वस्तुनिष्ठ माहिती समोर आल्यानंतर संबंधित व्यक्तीविरोधात कडक कारवाई केली जाईल, अशी भूमिका पंकज भोयर यांनी स्पष्ट केली.
गुरुद्वारा परिसरासारख्या संवेदनशील ठिकाणी सुखबीर सिंह बादल यांच्यावर झालेल्या हल्ल्यामुळे सुरक्षा व्यवस्थेचा मुद्दाही चर्चेत आला आहे. पोलिसांकडून आता हल्ल्याच्या पार्श्वभूमीचा आणि आरोपीच्या उद्देशाचा तपास केला जात आहे.
