सब रजिस्ट्रार कृष्णा राऊत यांच्यासह संबंधित दोषींवर फौजदारी गुन्हे दाखल करण्याची मागणी; चौकशी न झाल्यास आंदोलनाचा इशारा
नागपूर : दुय्यम निबंधक कार्यालय क्रमांक 5 तसेच इतर कार्यालयांमध्ये बनावट किंवा डुप्लिकेट RL, NA, नगररचना नकाशा आणि Sanction Map यांच्या आधारे तब्बल 500 ते 600 बनावट दस्तनोंदणी झाल्याचा गंभीर आरोप महाराष्ट्र प्रदेश युवक काँग्रेसने केला आहे. या प्रकरणाची तातडीने विभागीय आणि निष्पक्ष चौकशी करण्यात यावी, अशी मागणी युवक काँग्रेसच्या वतीने करण्यात आली आहे.
यासंदर्भात नोंदणी उपमहानिरीक्षक तथा मुद्रांक उपनियंत्रक, नागपूर विभाग यांच्याकडे युवक काँग्रेसने निवेदन साद केले. बनावट शिक्के असलेल्या पुराव्यांसह हे निवेदन देण्यात आल्याचे सांगण्यात आले.
या प्रकरणातील कागदपत्रांची मूळ शासकीय अभिलेखांशी पडताळणी करावी, तसेच संबंधित कार्यालयांमधील CCTV फुटेज आणि डिजिटल रेकॉर्ड सुरक्षित ठेवावेत, अशी मागणी निवेदनातून करण्यात आली आहे. यासोबतच सब रजिस्ट्रार कृष्णा राऊत यांच्यासह सर्व संबंधितांची भूमिका तपासण्यात यावी, असेही युवक काँग्रेसने म्हटले आहे.
चौकशीदरम्यान गैरप्रकार किंवा बनावट कागदपत्रांचा वापर झाल्याचे सिद्ध झाल्यास कृष्णा राऊत यांच्यासह सर्व दोषींविरोधात तातडीने फौजदारी गुन्हे दाखल करावेत, अशी मागणी करण्यात आली आहे.
दरम्यान, प्रशासनाने या प्रकरणाची तातडीने विभागीय चौकशी करून आवश्यक कारवाई केली नाही, तर महाराष्ट्र प्रदेश युवक काँग्रेसच्या वतीने तीव्र आंदोलन छेडण्यात येईल, असा इशारा देण्यात आला आहे.
निवेदन साद करताना महाराष्ट्र प्रदेश युवक काँग्रेसचे महासचिव अक्षय हेटे, तसेच सुशांत लोखंडे, रजा अली, समीर तिमांडे, आशुतोष कांबळे, शिवम चौधरी, साहिल मोहोड आणि अनुप भंडारी यांच्यासह अन्य पदाधिकारी उपस्थित होते.
