कोराडी थर्मल पॉवर प्लांटमध्ये वरिष्ठ पदावर होते कार्यरत; मोबाईल जप्त करून तिवसा पोलिसांकडून तपास सुरू
अमरावती : नागपूरमधील एका खासगी कंपनीत वरिष्ठ पदावर कार्यरत असलेल्या 39 वर्षीय इंजिनिअरने गुरुकुंज मोझरी परिसरात आत्महत्या केल्याची घटना रविवारी सकाळी उघडकीस आली. राम विनोद चौधरी असे मृताचे नाव असून, त्यांनी हे टोकाचे पाऊल का उचलले, याचे कारण अद्याप स्पष्ट झालेले नाही.
राम विनोद चौधरी हे नागपूरमधील कोराडी थर्मल पॉवर प्लांटमध्ये वरिष्ठ पदावर कार्यरत होते. पोलिसांनी दिलेल्या माहितीनुसार, रविवारी सकाळी ते स्वतःच्या हुंडई कारने नागपूरहून अमरावतीच्या दिशेने आले होते.
गुरुकुंज मोझरी बायपासलगत असलेल्या राष्ट्रसंत पेट्रोलियमजवळ त्यांनी कार उभी केली. त्यानंतर जवळील शेतात जाऊन आंब्याच्या झाडाला दोरीच्या साहाय्याने गळफास घेतल्याचे समोर आले आहे.
सकाळी आठच्या सुमारास घटना उघडकीस
रविवारी सकाळी सुमारे आठ वाजता ही घटना निदर्शनास आली. माहिती मिळताच तिवसा पोलिसांनी घटनास्थळी धाव घेतली आणि पंचनामा केला. मृतदेह शवविच्छेदनासाठी पाठवण्यात आला असून या प्रकरणी अकस्मात मृत्यूची नोंद करण्यात आली आहे.
पत्नी आणि नातेवाईकांना पाठवले होते लोकेशन
प्राथमिक माहितीनुसार, आत्महत्येपूर्वी चौधरी यांनी पत्नी आणि काही नातेवाईकांना गुरुकुंज मोझरी परिसरातील स्वतःचे लोकेशन पाठवले होते. या पार्श्वभूमीवर पोलिसांनी त्यांचा मोबाईल जप्त केला असून त्यातील माहितीची तपासणी केली जात आहे.
नागपूरहून इतक्या दूर गुरुकुंज मोझरी परिसरात येऊन त्यांनी आत्महत्येचे पाऊल का उचलले, याचा शोध पोलीस घेत आहेत. कुटुंबीय, नातेवाईक आणि संबंधित व्यक्तींची चौकशी करून प्रकरणाचा विविध अंगांनी तपास सुरू आहे. तपास पूर्ण झाल्यानंतरच आत्महत्येमागील नेमके कारण स्पष्ट होणार असल्याचे पोलिसांनी सांगितले आहे.
