व्हायरल व्हिडीओनंतर संताप; संबंधित फ्लॅट मालकाचीच शाकाहारी कुटुंबाला घर देण्याची इच्छा होती, कावरेचा दावा
मुंबईतील ताडदेव परिसरातील एका फ्लॅटच्या विक्री व्यवहारावरून सोशल मीडियावर सुरू झालेल्या चर्चेला आता नवे वळण मिळाले आहे. रिअल इस्टेट एजंट भावेश कावरे याचा एक व्हिडीओ सोशल मीडियावर मोठ्या प्रमाणात व्हायरल झाला होता. या व्हिडीओमध्ये मांसाहार करणाऱ्या व्यक्तीला ताडदेवमध्ये घर मिळणार नाही, तर शाकाहारी व्यक्तीला घर मिळू शकते, असे तो सांगताना दिसत होता. यानंतर घर खरेदी-विक्रीत खानपानाच्या सवयींच्या आधारावर भेदभाव केला जात असल्याच्या आरोपांवरून संताप व्यक्त करण्यात आला.
मात्र, या प्रकरणात भावेश कावरेने स्वतःची बाजू मांडत व्हिडीओमागील संदर्भ स्पष्ट केला आहे. त्याच्या म्हणण्यानुसार, संबंधित फ्लॅट एका मराठी व्यक्तीच्या मालकीचा होता. संबंधित घरमालक वारकरी असून, आपला फ्लॅट शाकाहारी व्यक्ती किंवा कुटुंबाने खरेदी करावे, अशी त्यांची वैयक्तिक इच्छा होती. हीच बाब आपण संभाव्य ग्राहकांना सांगितल्याचे कावरेने स्पष्ट केले.
कावरेच्या माहितीनुसार, संबंधित फ्लॅटची विक्री झाली असून तो एका मराठी व्यक्तीनेच खरेदी केला आहे. विशेष म्हणजे, हा फ्लॅट अतिशय कमी कालावधीत विकला गेल्याचा दावाही त्याने केला आहे.
ही मुंबई मराठी माणसाची आहे. आगरी-कोळी बांधवांची आहे. महाराष्ट्राच्या कष्टकरी, सर्वसामान्य माणसाची आहे.
— Shubham Karpe | शुभम करपे (@ShubhamKarpe10) August 12, 2026
आणि मुंबईत कोणी काय खावं, काय खाऊ नये हे ठरवणारे तुम्ही कोण?
माणूस मच्छी, मटण किंवा चिकन खातो म्हणून त्याला घर नाकारणं ही फक्त घर देण्याची मनमानी नाही ही उघड सामाजिक भेदभावाची… pic.twitter.com/84k06soddf
नेमका वाद कशामुळे सुरू झाला?
ताडदेवमधील एका आलिशान नव्या हाय-राईज इमारतीतील फ्लॅटच्या विक्रीसंदर्भातील व्हिडीओ समोर आल्यानंतर या प्रकरणाची चर्चा सुरू झाली. व्हिडीओमध्ये रिअल इस्टेट एजंट मांसाहारी ग्राहकाला फ्लॅट मिळणार नसल्याचे, तर शाकाहारी ग्राहकाला घर मिळू शकत असल्याचे सांगताना दिसत होता.
मुंबईसारख्या विविध संस्कृती आणि खाद्यपरंपरा असलेल्या शहरात घर खरेदी करतानाही व्यक्तीच्या खानपानाच्या सवयींचा विचार केला जावा का, असा प्रश्न यानंतर उपस्थित झाला. शाकाहारी आणि मांसाहारी नागरिकांना घर देण्यास नकार देण्याचे प्रकार यापूर्वीही मुंबईत चर्चेत आले आहेत.
‘संपूर्ण इमारतीसाठी अशी अट नाही’
व्हायरल झालेल्या व्हिडीओबाबत स्पष्टीकरण देताना भावेश कावरेने आपण संपूर्ण इमारतीतील घरांसाठी मांसाहारी नागरिकांना प्रवेश नसल्याचे म्हटलेले नसल्याचे सांगितले.
आपण केवळ संबंधित फ्लॅटच्या मालकाची इच्छा ग्राहकांना कळवत होतो, असा दावा त्याने केला. त्यामुळे त्याच्या व्हिडीओचा अर्थ संपूर्ण इमारतीतील सर्व फ्लॅटसाठी शाकाहारी असण्याची अट आहे, असा काढणे योग्य नसल्याचे त्याने स्पष्ट केले.
‘शाकाहार-मांसाहार हा वैयक्तिक विषय’
शाकाहार किंवा मांसाहार हा प्रत्येक व्यक्तीच्या पसंतीचा विषय असल्याचेही कावरेने सांगितले. मुंबईमध्ये मोठ्या प्रमाणावर नागरिक मांसाहार करत असले तरी शाकाहारी लोकांच्याही पसंतीचा विचार केला पाहिजे, असे त्याचे म्हणणे आहे.
संबंधित घरमालकाला आपला फ्लॅट शाकाहारी कुटुंबाला विकायचा होता. त्यामुळे मालकाची ही इच्छा आपण ग्राहकांसमोर मांडली, असा कावरेचा दावा आहे.
‘माझे ४० वर्षे जुने चिकनचे दुकान’
आपण मांसाहाराच्या विरोधात असल्याचा आरोप चुकीचा असल्याचे सांगताना भावेश कावरेने आपल्या वैयक्तिक व्यवसायाचा दाखला दिला. आपले स्वतःचे चिकनचे दुकान असून या व्यवसायाला ४० वर्षे झाली आहेत, असे त्याने सांगितले.
ताडदेवमधील फ्लॅटच्या व्हिडीओमुळे मुंबईतील गृहनिर्माण व्यवहारांमध्ये शाकाहारी आणि मांसाहारी नागरिकांशी संबंधित भेदभावाचा मुद्दा पुन्हा चर्चेत आला आहे. मात्र, संबंधित फ्लॅटच्या मालकाची वैयक्तिक इच्छा आपण केवळ ग्राहकांपर्यंत पोहोचवली होती, असे भावेश कावरेने स्पष्ट केले आहे.
त्यामुळे या प्रकरणाकडे पाहताना व्हायरल व्हिडीओतील वक्तव्याबरोबरच त्यामागील संदर्भ आणि कावरेने दिलेले स्पष्टीकरण या दोन्ही बाजू विचारात घेणे महत्त्वाचे ठरत आहे.
