रिसोड (Missing Person) : रिसोड तालुक्यातील हराळ येथील 32 वर्षीय युवक अकोला येथे आपल्या आई व भाऊसोबत उपचारासाठी गेलेला असताना बेपत्ता झाल्याची घटना समोर आली आहे. ही घटना दिनांक 27 एप्रिल 2026 रोजी घडली असून, परिवाराकडून अकोला येथील सिव्हिल लाईन पोलीस स्टेशनमध्ये बेपत्ता झाल्याची तक्रार दाखल करण्यात आली आहे.
मात्र आज (1 मे) पर्यंत त्याचा कोणत्याही प्रकारचा पत्ता लागलेला नसल्याने कुटुंबीय चिंतेत आहेत. सोपान धोंडूबा खाडे उर्फ बंडू (वय 32 वर्षे) असे बेपत्ता झालेल्या युवकाचे नाव आहे.
मिळालेल्या माहितीनुसार, सोपान उर्फ बंडू हा दिनांक 27 एप्रिल रोजी आपल्या आई व भावासोबत अकोल्यातील एका खाजगी दवाखान्यात उपचारासाठी गेला होता. डॉक्टरांनी तपासणी केल्यानंतर तो दवाखान्याबाहेर आला व तेथून निघून गेला. त्यानंतर तो परत न आल्याने आई व भावाने त्याचा सर्वत्र शोध घेतला, मात्र काहीही ठावठिकाणा लागला नाही.
सोपान उर्फ बंडू हा शेतमजूर असून, शेतात काम करत असताना त्याच्या डोक्याला ट्रॅक्टरच्या ट्रॉलीच्या फाल्क्याचा फटका बसला होता. त्या अपघातानंतर त्याची तब्येत ठीक नसल्याचे सांगितले जाते. डोक्याला मार लागल्यामुळे त्याच्या मानसिक स्थितीवरही परिणाम झाल्याचे हराळ येथील ग्रामस्थांचे म्हणणे आहे.
दरम्यान, अकोला पोलीस आणि कुटुंबीयांकडून त्याचा शोध सुरू असून, नागरिकांनी संबंधित युवकाबाबत कोणतीही माहिती मिळाल्यास जवळच्या पोलीस स्टेशनशी संपर्क साधावा, असे आवाहन करण्यात आले आहे.
