स्लॅब टाकण्याचे काम सुरू असतानाच दुर्घटना; ढिगाऱ्याखाली अडकलेल्या कामगारांचा शोध, जेसीबीच्या सहाय्याने बचावकार्य सुरू
सांगली : मिरज येथील शासकीय रुग्णालयाच्या प्रवेशद्वारावर उभारण्यात येत असलेल्या नवीन कमानीचा स्लॅब अचानक कोसळल्याने मोठी दुर्घटना घडली आहे. बांधकामाचे काम सुरू असतानाच स्लॅबचा भाग कोसळला आणि त्याखाली अनेक कामगार अडकले. प्राथमिक माहितीनुसार, या घटनेत सात ते आठ कामगार गंभीर जखमी झाले असून दोन जणांचा मृत्यू झाल्याची माहिती समोर येत आहे.
दुर्घटनेनंतर घटनास्थळी तातडीने बचावकार्य हाती घेण्यात आले. ढिगाऱ्याखाली अडकलेल्या कामगारांपैकी पाच ते सहा जणांना आतापर्यंत बाहेर काढण्यात यश आले आहे. मात्र, आणखी काही कामगार अडकले असण्याची शक्यता असल्याने त्यांचा शोध सुरू आहे. जेसीबीच्या मदतीने कोसळलेला स्लॅब आणि बांधकामाचा मलबा हटवण्याचे काम वेगाने सुरू आहे.
घटनेची माहिती मिळताच पोलीस तसेच रुग्णालय प्रशासन घटनास्थळी पोहोचले. जखमी कामगारांना तातडीने उपचारासाठी रुग्णालयात दाखल करण्यात येत असून बचाव पथकांकडून ढिगाऱ्याखाली अडकलेल्या व्यक्तींचा शोध घेतला जात आहे. दुर्घटनेची माहिती परिसरात पसरताच घटनास्थळी नागरिकांची मोठी गर्दी झाली.
मिरज शासकीय रुग्णालयाच्या प्रवेशद्वारावर नवीन कमान उभारण्याचे काम सुरू होते. याच बांधकामासाठी स्लॅब टाकण्याची प्रक्रिया सुरू असताना तो अचानक खाली कोसळल्याचे प्राथमिक माहितीतून समोर आले आहे. मात्र, दुर्घटनेमागचे नेमके कारण अद्याप स्पष्ट झालेले नाही.
दरम्यान, या दुर्घटनेत मृत्यू झालेल्या आणि जखमींची नेमकी संख्या प्रशासनाकडून अद्याप अधिकृतपणे जाहीर करण्यात आलेली नाही. त्यामुळे बचावकार्य पूर्ण झाल्यानंतरच मृत आणि जखमींचा निश्चित आकडा स्पष्ट होण्याची शक्यता आहे.
