लक्ष्मण टवले चार दिवसांपासून टाकीवरच उपोषणाला; पोलीस प्रशासनाने घटनास्थळी भेट देऊन घेतली माहिती
कळमनुरी : मराठा आरक्षणासह विविध मागण्यांसाठी मनोज जरांगे पाटील यांच्या सुरू असलेल्या आंदोलनाला पाठिंबा देण्यासाठी कळमनुरी तालुक्यातील पुयना येथील लक्ष्मण टवले यांनी अनोख्या पद्धतीने आंदोलन सुरू केले आहे. ३ सप्टेंबर रोजी सायंकाळी साडेपाच वाजण्याच्या सुमारास गावातील पाण्याच्या टाकीवर चढून त्यांनी बेमुदत उपोषणाला सुरुवात केली. गेल्या चार दिवसांपासून टवले हे पाण्याच्या टाकीवरच उपोषण करत आहेत.
मनोज जरांगे पाटील यांच्या आंदोलनाला समर्थन देण्यासाठी तसेच मराठा आरक्षणासह विविध मागण्यांकडे शासनाचे लक्ष वेधण्यासाठी लक्ष्मण टवले यांनी हे आंदोलन सुरू केले आहे. मागण्या मान्य होईपर्यंत उपोषण मागे घेणार नसल्याचा निर्धार त्यांनी व्यक्त केला आहे.
टवले हे पाण्याच्या टाकीवर उपोषणाला बसल्याची माहिती मिळाल्यानंतर पोलीस प्रशासनाने घटनास्थळी धाव घेत परिस्थितीची पाहणी केली. सपोउपनिरीक्षक लक्ष्मीकांत माखणे आणि नामदेव कोटकर यांनी उपोषणस्थळी भेट देत लक्ष्मण टवले यांच्याशी चर्चा केली.
पाण्याच्या टाकीवर सुरू असलेल्या या आंदोलनामुळे परिसरातील नागरिकांचे लक्ष वेधले गेले आहे. टवले यांच्या आंदोलनाला स्थानिक नागरिकांकडूनही प्रतिसाद मिळत असून, प्रशासनाकडून परिस्थितीवर लक्ष ठेवण्यात येत आहे.
मागण्या पूर्ण होईपर्यंत उपोषण सुरूच ठेवण्याची भूमिका लक्ष्मण टवले यांनी घेतली आहे. त्यामुळे पुढील काळात प्रशासनाकडून कोणती भूमिका घेतली जाते, याकडे स्थानिक नागरिकांचे लक्ष लागले आहे.
