आत्मसमर्पित माओवाद्यांकडून मिळालेल्या गोपनीय माहितीच्या आधारे विशेष मोहीम
गडचिरोली (Maoist Operation) : माओवादी शासनविरोधी विविध घातपाती कारवायांसाठी जंगल परिसरात गुप्तपणे शस्त्रे व स्फोटक साहित्य जमिनीत पुरून ठेवत असल्याची माहिती समोर आली होती. या साहित्याचा वापर नक्षल सप्ताह, निवडणुका आदी प्रसंगी सुरक्षा दलांवर हल्ले करण्यासाठी केला जात असल्याचे सांगितले जाते. दरम्यान, गडचिरोली जिल्ह्यातील माओवाद जवळपास संपुष्टात येत असताना, जंगलात लपवून ठेवलेले साहित्य हस्तगत करण्यात गडचिरोली पोलिसांना मोठे यश आले आहे.
सविस्तर वृत्त असे की, दिनांक १६ मे २०२६ रोजी ‘ऑपरेशन अंतिम प्रहार’ अंतर्गत गडचिरोली पोलीस दलासमोर आत्मसमर्पण केलेल्या माओवाद्यांची सखोल चौकशी करण्यात आली. चौकशीदरम्यान माओवाद्यांनी पोमकें-बिनागुंडा हद्दीतील जंगल परिसरात शस्त्रनिर्मिती व इतर साहित्य लपवून ठेवल्याची माहिती पोलिसांना दिली.
या माहितीच्या आधारे २१ मे २०२६ रोजी पोलीस अधीक्षक एम. रमेश यांच्या मार्गदर्शनाखाली विशेष अभियान पथक गडचिरोली व प्राणहिता यांच्या संयुक्त सहा तुकड्या तसेच बीडीडीएसची दोन पथके शोध मोहिमेसाठी रवाना करण्यात आली.
२२ मे रोजी पोमकें-बिनागुंडाच्या उत्तरेकडील जंगल परिसरात विशेष अभियान पथकांनी घेरा घालून कसून तपासणी केली. यावेळी बीडीडीएसच्या जवानांना एक लेथ मशीन, बीजीएल पाईप्स, १२ बोअर पाईप, इन्व्हर्टर, जनरेटर, बॅटरी, ग्राइंडिंग व ड्रिलिंग मशीन, जिग सॉ मशीन, प्रेशर पंप, सोलर पॅनल, फुटबॉल पाईप (२० फूट) आदी माओवादी साहित्य आढळून आले.
वरिष्ठांच्या मार्गदर्शनाखाली घटनास्थळीच हे सर्व साहित्य जवानांच्या मदतीने नष्ट करण्यात आले.
ही कारवाई पोलीस अधीक्षक एम. रमेश, अपर पोलीस अधीक्षक (अभियान) कार्तिक मधिरा, अपर पोलीस अधीक्षक (प्रशासन) गोकुल राज जी. तसेच पोलीस उपअधीक्षक (अभियान) विशाल नागरगोजे यांच्या मार्गदर्शनाखाली विशेष अभियान पथक, प्राणहिता व बीडीडीएस पथकातील जवानांनी यशस्वीरित्या पार पाडली. या कारवाईतील सहभागी जवानांचे पोलीस अधीक्षक एम. रमेश यांनी कौतुक केले.
