आश्रमशाळांतील विद्यार्थ्यांना गणवेशापासून वंचित ठेवू नका; तातडीने वितरणाची स्वराज्य शिक्षक संघाची मागणी

सेनगाव (Ashram School Student Uniform) : राज्यातील विमुक्त जाती व भटक्या जमातीतील विद्यार्थ्यांना शिक्षणाच्या मुख्य प्रवाहात आणण्यासाठी आणि त्यांचे जीवनमान उंचावण्यासाठी सुरू करण्यात आलेल्या आश्रमशाळांमधील विद्यार्थ्यांना अद्याप शालेय गणवेश, शूज व सॉक्सचे वितरण न झाल्याचा मुद्दा ऐरणीवर आला आहे. या पार्श्वभूमीवर विद्यार्थ्यांना तात्काळ साहित्य उपलब्ध करून देण्याची मागणी स्वराज्य शिक्षक संघाने केली आहे.

हरितक्रांतीचे प्रणेते व माजी मुख्यमंत्री वसंतराव नाईक यांच्या संकल्पनेतून सन १९५३ पासून आश्रमशाळा योजना सुरू करण्यात आली. सध्या इतर मागास बहुजन कल्याण विभागांतर्गत राज्यात स्वयंसेवी संस्थांमार्फत १०० टक्के अनुदान तत्त्वावर ९८० आश्रमशाळा चालवल्या जात आहेत. हिंगोली जिल्ह्यात प्राथमिक ८, माध्यमिक ८ आणि उच्च माध्यमिक ४ आश्रमशाळा कार्यरत आहेत. दरम्यान, राज्यात (विदर्भ वगळता) १५ जूनपासून शाळा सुरू झाल्या असून, शासनाच्या निर्देशानुसार जिल्हा परिषद शाळांमध्ये विद्यार्थ्यांना पहिल्याच दिवशी गणवेश, पाठ्यपुस्तके, शूज व सॉक्सचे वितरण करण्यात आले. मात्र निवासी आश्रमशाळांतील विद्यार्थ्यांना अद्याप हे साहित्य मिळाले नसल्याची बाब समोर आली आहे.

शासन नियमानुसार आश्रमशाळेतील विद्यार्थ्यांना दोन गणवेश, वह्या, पाठ्यपुस्तके, शूज व सॉक्स देणे बंधनकारक आहे. तरीही जिल्ह्यातील अनेक आश्रमशाळांमध्ये या साहित्याचे वितरण अद्याप झाले नसल्याचा दावा स्वराज्य शिक्षक संघाने केला आहे. याबाबत स्वराज्य शिक्षक संघाचे राज्य उपाध्यक्ष रमेश जावळे यांनी इतर मागास बहुजन कल्याण विभागाचे सहाय्यक संचालक प्रदीप धर्माधिकारी यांना निवेदन देत विद्यार्थ्यांना एक शालेय गणवेश, एक खेळाचा गणवेश, शूज व सॉक्स तात्काळ वितरित करावेत, अशी मागणी केली आहे. विद्यार्थ्यांचे शैक्षणिक नुकसान टाळण्यासाठी प्रशासनाने त्वरित निर्णय घ्यावा, अशी अपेक्षा व्यक्त करण्यात येत आहे.