चाकूरच्या वैभवात भर; २ कोटी ५४ लाखांच्या शासकीय विश्रामगृहाचे उद्या लोकार्पण

चाकूर (Chakur Government Rest House) : शहराच्या वैभवात आणखी एक मानाचा तुरा रोवला जाणार असून, सुमारे २ कोटी ५४ लाख रुपये खर्चून उभारण्यात आलेल्या भव्य शासकीय विश्रामगृहाच्या इमारतीचा लोकार्पण सोहळा उद्या, शनिवार (१५ ऑगस्ट) रोजी सकाळी ११. ३० वाजता थाटात पार पडणार आहे. या भव्य इमारतीचा लोकार्पण सोहळा जिल्ह्याचे पालकमंत्री तथा सार्वजनिक बांधकाम मंत्री शिवेंद्रसिंह राजे भोसले यांच्या शुभहस्ते होणार असून, कार्यक्रमाच्या अध्यक्षस्थानी राज्याचे सहकार मंत्री नामदार बाबासाहेब पाटील राहणार आहेत.

चाकूर विधानसभा मतदारसंघात सहकार मंत्री बाबासाहेब पाटील यांनी विशेष लक्ष घातल्याने विविध विकासकामांना गती मिळत असल्याचे चित्र आहे. शहरासह ग्रामीण भागातील पायाभूत सुविधा, रस्ते, शासकीय इमारती आणि नागरिकांच्या सोयी-सुविधांसाठी त्यांनी सातत्याने पाठपुरावा केल्याने विकासकामांना चालना मिळत आहे. त्यामुळे चाकूरच्या विकासाच्या दृष्टीने बाबासाहेब पाटील यांच्या कार्याचे नागरिकांकडून कौतुक होत आहे.

शासकीय विश्रामगृहाची (Chakur Government Rest House) ही भव्य इमारत चाकूरच्या विकासाचा एक महत्त्वाचा टप्पा मानली जात आहे. प्रशस्त आणि आधुनिक सुविधांनी सुसज्ज असलेल्या या इमारतीमुळे चाकूर येथे शासकीय कामानिमित्त येणारे अधिकारी, लोकप्रतिनिधी तसेच विविध क्षेत्रातील मान्यवरांना चांगली सुविधा उपलब्ध होणार आहे. या इमारतीच्या माध्यमातून चाकूर शहराच्या विकासाला आणखी एक नवी ओळख मिळणार असून, शहराच्या सौंदर्यातही भर पडणार आहे. विकासकामांना प्राधान्य देत चाकूर मतदारसंघात विविध प्रकल्प मार्गी लावण्यासाठी सहकार मंत्री बाबासाहेब पाटील यांच्याकडून सुरू असलेल्या प्रयत्नांमुळे नागरिकांमध्येही समाधानाचे वातावरण आहे.

लोकार्पण सोहळ्यास चाकूर मतदारसंघातील विविध मान्यवर, पदाधिकारी, अधिकारी आणि नागरिक मोठ्या संख्येने उपस्थित राहणार आहेत. पालकमंत्री शिवेंद्रसिंह राजे भोसले आणि सहकार मंत्री बाबासाहेब पाटील यांच्या प्रमुख उपस्थितीत होणाऱ्या या सोहळ्याकडे चाकूरकरांचे लक्ष लागले असून, भव्य शासकीय विश्रामगृहाचे लोकार्पण पाहण्यासाठी नागरिकांमध्ये उत्सुकता निर्माण झाली आहे.