'वॉक फॉर वॉटर’मध्ये लातूरकरांचा उत्स्फूर्त सहभाग!

‘पाणी अडवा, पाणी जिरवा, जलयुक्त महाराष्ट्र घडवा’चा जागर

लातूर (Latur Walk for Water) : मृद व जलसंधारण विभागाच्या वतीने शुक्रवारी जलसंधारण दिनानिमित्त लातूर येथे ‘महा वॉकेथॉन - वॉक फॉर वॉटर’ या उपक्रमात लातूर जिल्हा परिषद प्रांगणात जिल्हाधिकारी डॉ. भारत बास्टेवाड यांच्या हस्ते हिरवी झेंडी दाखवून सुरुवात झाली. ‘सेव्ह सॉईल, सेव्ह वॉटर, सिक्युर टुमारो’ ही या कार्यक्रमाची संकल्पना होती, तर ‘पाणी अडवा, पाणी जिरवा, जलयुक्त महाराष्ट्र घडवा’ हे घोषवाक्य होते.

याप्रसंगी जि. प. मुख्य कार्यकारी अधिकारी राहुल कुमार मीना, जि. प. बांधकाम सभापती ज्ञानेश्वर बिराजदार, जिल्हा नियोजन अधिकारी सोमनाथ रेड्डी, माध्यमिक शिक्षणाधिकारी रोहिणी कुंभार आणि जिल्हा जलसंधारण अधिकारी जावेद पटेल यांच्यासह नागरिक मोठ्या संख्येने उपस्थित होते. यावेळी उपस्थितांना मृद व जलसंधारणाची शपथ देण्यात आली.
माजी मुख्यमंत्री दिवंगत सुधाकरराव नाईक यांच्या जयंतीनिमित्त या वर्षापासून २१ ऑगस्ट हा दिवस जलसंधारण दिन म्हणून साजरा करण्यात येत आहे. या पार्श्वभूमीवर शाश्वत विकासासाठी मृद व जलसंधारणाचे महत्त्व पटवून देण्यासाठी १५ ते २१ ऑगस्ट २०२६ दरम्यान जलसंधारण सप्ताह आयोजित करण्यात आला होता. जिल्हा परिषद प्रांगणापासून सुरू झालेली ही महा वॉकेथॉन नवीन जिल्हाधिकारी कार्यालयापर्यंत चालत पार पडल्यानंतर तिचा समारोप झाला.

लातूर जिल्ह्यात जलसंधारणाची कामे वेगाने होत असून पूर्वीपेक्षा परिस्थिती सुधारत आहे. सध्या एल निनोचे संकट असून भविष्यातही अशी संकटे येऊ शकतात. त्यामुळे 
पावसाचे पाणी जमिनीत जिरवणे आणि भूजल पुनर्भरण करण्यासाठी प्रयत्न करणे ही काळाची गरज आहे. यादृष्टीने सर्वांनी पुढे येऊन मृद व जलसंधारणात आपला वाटा उचलावा, असे आवाहन जिल्हाधिकारी डॉ. भारत बास्टेवाड यांनी केले. जिल्हाधिकाऱ्यांनी तीन किलोमीटरची वॉकेथॉन पूर्ण केली.

प्रभाकर शिवानंद परीट यांना २५ हजारांचे प्रथम बक्षीस

वॉकेथॉनचा समारोप झाल्यानंतर बक्षीस वितरण करण्यात आले. या (Latur Walk for Water) कार्यक्रमात ग्रीन लातूर वृक्ष फाउंडेशनचे पथक विशेष लक्षवेधी ठरले, त्यांनी छत्रीच्या साहाय्याने विविध संदेश रेखाटत ‘सेव्ह वॉटर, सेव्ह सॉईल’चा प्रसार केला. महा वॉकेथॉनमध्ये जिल्हास्तरावर २५ हजार रुपयांचे प्रथम क्रमांकाचे बक्षीस प्रभाकर शिवानंद परीट याने, १५ हजार रुपयांचे द्वितीय बक्षीस श्याम जगन्नाथ माने याने, तर १० हजार रुपयांचे तृतीय क्रमांकाचे बक्षीस शेख सरफराज गफार याने पटकावले. यासोबतच लकी ड्रॉ (ईश्वर चिठ्ठी) द्वारे ७ सहभाग्यांची निवड करून त्यांना प्रत्येकी ३ हजार रुपयांचे बक्षीस व सन्मानचिन्ह देण्यात आले.