हिंगोली (Ladki Bahin Yojana) : लाडकी बहीण योजनेचे हप्ते वेळेवर मिळत नसल्याने संतप्त झालेल्या शेकडो महिलांनी आज जिल्हाधिकारी कार्यालयावर धडक देत जोरदार गोंधळ घातला. सकाळी 11 वाजल्यापासून जिल्हाधिकारी कार्यालयाच्या आवारात जमलेल्या महिलांनी "आमचे पैसे आम्हाला द्या", "लाडकी बहीण योजना सुरू ठेवा" अशा घोषणा देत प्रशासनाला धारेवर धरले. गेल्या दोन महिन्यांपासून योजनेचा हप्ता खात्यावर जमा न झाल्याने महिलांमध्ये तीव्र नाराजी पसरली आहे. अनेक महिलांनी सणासुदीच्या तोंडावर पैशांची गरज असल्याचे सांगत अधिकाऱ्यांना जाब विचारला. काही महिलांनी तर कार्यालयाच्या पायऱ्यांवरच ठिय्या मांडला. त्यामुळे काही काळ कार्यालयातील कामकाज विस्कळीत झाले.
आंदोलनकर्त्या महिलांनी सांगितले की, (Ladki Bahin Yojana) अर्ज मंजूर होऊनही तांत्रिक कारण देत हप्ते रोखले जात आहेत. बँक खात्याला आधार लिंक, केवायसी पूर्ण असूनही पैसे येत नाहीत. यामुळे घरखर्च चालवणे कठीण झाल्याची व्यथा महिलांनी मांडली.
घटनेची माहिती मिळताच उपजिल्हाधिकारी व तहसीलदार यांनी आंदोलक महिलांची भेट घेऊन चर्चा केली. तांत्रिक अडचणींमुळे काही लाभार्थ्यांचे पैसे रखडले असून येत्या आठ दिवसांत सर्व पात्र महिलांच्या खात्यावर प्रलंबित हप्ते जमा केले जातील, असे आश्वासन प्रशासनाकडून देण्यात आले. तसेच ज्या महिलांचे अर्ज त्रुटींमुळे प्रलंबित आहेत, त्यांच्यासाठी विशेष शिबिर घेऊन त्रुटी दूर केल्या जातील, असेही अधिकाऱ्यांनी स्पष्ट केले.
आश्वासनानंतर महिलांनी आंदोलन मागे घेतले, मात्र दिलेल्या मुदतीत पैसे न मिळाल्यास पुन्हा तीव्र आंदोलन छेडण्याचा इशारा महिलांनी दिला आहे. या (Ladki Bahin Yojana) प्रकारामुळे जिल्ह्यात लाडकी बहीण योजनेच्या अंमल बजावणीवर प्रश्नचिन्ह निर्माण झाले आहे.
