हिंगोली (Teacher Justice Movement) : शिक्षकांवरील वाढता प्रशासकीय ताण, टीईटीची सक्ती, बीएलओ व एसआयआरसारख्या अशैक्षणिक जबाबदाऱ्यांमुळे निर्माण झालेल्या असंतोषाच्या पार्श्वभूमीवर महाराष्ट्र राज्य प्राथमिक शिक्षक संघटना समन्वय समितीच्या नेतृत्वाखाली गुरुवार ९ जुलै रोजी राज्यव्यापी शाळा बंद आंदोलन होत आहे. या आंदोलनात हिंगोली जिल्ह्यातील सर्व प्रमुख शिक्षक संघटनांनी सक्रिय सहभाग जाहीर केला असून, जिल्ह्यातील स्थानिक स्वराज्य संस्थांच्या शाळा बंद ठेवून सकाळी ११ वाजता जिल्हाधिकारी कार्यालयासमोर धरणे आंदोलन करण्यात येणार आहे.
शिक्षक संघटनांच्या म्हणण्यानुसार, टीईटीची सक्ती रद्द करणे, बीएलओ व एसआयआरसारख्या अतिरिक्त कामांतून शिक्षकांची मुक्तता, जुनी पेन्शन योजना लागू करणे, विषय शिक्षकांना वेतनश्रेणी देणे, २४ वर्षे सेवा पूर्ण केलेल्या शिक्षकांना निवड श्रेणी मंजूर करणे, आठवा वेतन आयोग लागू करणे यासह विविध प्रलंबित मागण्यांवर शासनाने तातडीने निर्णय घ्यावा, अशी मागणी करण्यात आली आहे.
आंदोलनाच्या पार्श्वभूमीवर बुधवारी जिल्ह्यातील प्रत्येक तालुक्यात शिक्षक संघटनांच्या प्रतिनिधींच्या बैठका घेण्यात आल्या. या बैठकीत सर्व संघटनांनी एकमुखाने शाळा बंद आंदोलन यशस्वी करण्याचा निर्धार व्यक्त केला. तसेच सर्व शिक्षकांनी सामूहिक रजा घेऊन आंदोलनात शंभर टक्के सहभाग नोंदवावा, असे आवाहन करण्यात आले.
या बैठकीस व्ही. डी. देशमुख, सुभाष जिरवणकर, दत्ता पडोळे, विजय राठोड, गजानन बोरकर, किरण राठोड, रमेश क्षिरसागर, सचिन गायकवाड, रमेश खंदारे, यशवंते सर, हरिभाऊ मुटकुळे, पंडित नागरगोजे, डी. जी. शिंदे, रमेश जाधव, भगवान माखणे, श्रीराम महाजन, मधुकर गडदे, माधव वायचाळ आदींसह जिल्ह्यातील विविध शिक्षक संघटनांचे प्रतिनिधी उपस्थित होते. आंदोलन यशस्वी करण्यासाठी संघटनांकडून व्यापक तयारी करण्यात आली असून, शिक्षकांमध्ये उत्स्फूर्त प्रतिसाद मिळत असल्याचा दावा समन्वय समितीने केला आहे.
