तरुण उद्योजक विजय गाढवे यांचा पर्यावरण पूरक प्रयोग
इंधन खर्चात मोठी बचत
सेनगाव (Sengaon Biogas Hotel) : वाढत्या गॅस दरांमुळे सर्वसामान्यांसह हॉटेल व्यावसायिकांचे अर्थकारण कोलमडत असताना, सेनगाव शहरातील तरुण उद्योजक विजय गाढवे यांनी पर्यावरणपूरक ऊर्जेचा अभिनव पर्याय स्वीकारत आपल्या हॉटेलमध्ये बायोगॅसचा यशस्वी वापर सुरू केला आहे. पारंपरिक एलपीजी सिलिंडरला पर्याय म्हणून उभारण्यात आलेला हा ‘ग्रीन हॉटेल’चा प्रयोग सध्या शहरात चर्चेचा विषय ठरत आहे.
गाढवे यांनी हॉटेलच्या मागील बाजूस फ्लेक्सी (बॅग टाईप) बायोगॅस प्लांट उभारला असून, त्यामध्ये गायीचे शेण व सेंद्रिय कचऱ्याचा वापर केला जातो. या प्रक्रियेतून तयार होणारा बायोगॅस थेट हॉटेलमधील स्वयंपाकासाठी वापरला जात आहे. विशेष म्हणजे या प्रयोगामुळे इंधन खर्चात मोठी बचत होत असून, धूर व प्रदूषणातही लक्षणीय घट झाली आहे.
“सतत वाढणाऱ्या इंधन दरांमुळे खर्चाचा ताळमेळ बसविणे कठीण होत होते. कायमस्वरूपी आणि पर्यावरणपूरक उपाय म्हणून बायोगॅसचा पर्याय निवडला. आता खर्च कमी झाला असून, स्वच्छ ऊर्जेचाही लाभ मिळत आहे,” असे विजय गाढवे यांनी सांगितले.
या (Sengaon Biogas Hotel) अभिनव उपक्रमामुळे परिसरातील इतर हॉटेल चालक, शेतकरी आणि तरुण उद्योजकांमध्येही उत्सुकता निर्माण झाली आहे. सेंद्रिय कचऱ्याचे योग्य व्यवस्थापन करत ऊर्जानिर्मिती करण्याचा हा प्रयोग ग्रामीण भागासाठी प्रेरणादायी ठरत असल्याचे नागरिकांकडून सांगितले जात आहे. दरम्यान, पर्यावरण संवर्धन आणि स्वच्छ ऊर्जेला चालना देणाऱ्या अशा उपक्रमांना शासन व प्रशासनाने प्रोत्साहन देण्याची मागणीही नागरिकांतून होत आहे. सेनगावात सुरू झालेला हा ‘ग्रीन हॉटेल’चा प्रयोग भविष्यात ग्रामीण उद्योजकतेसाठी आदर्श मॉडेल ठरण्याची शक्यता व्यक्त केली जात आहे.
