कुरखेडा : कुरखेडा तालुक्यात अनेक शेतकऱ्यांना वनहक्क पट्टे मिळाले असले तरी अनेक पट्टेधारकांचे निधन झाल्यानंतर त्यांच्या वारसांची नावे अद्यापही संबंधित वनहक्क पट्ट्यांवर नोंदविण्यात आलेली नाहीत. त्यामुळे वारसांना विविध शासकीय कामांसाठी अडचणींचा सामना करावा लागत आहे.
या पार्श्वभूमीवर महसूल प्रशासन व तहसील कार्यालयाच्या माध्यमातून मृत वनहक्क पट्टेधारकांच्या वारसांची नावे वनहक्क पट्ट्यांवर नोंदविण्यासाठी कुरखेडा येथे विशेष शिबिर आयोजित करण्यात यावे, अशी मागणी युवती सेनेच्या वतीने करण्यात आली आहे.
यासंदर्भातील निवेदन उपविभागीय अधिकारी व तहसीलदार यांना देण्यात आले. यावेळी युवती सेना जिल्हाप्रमुख प्रा. उमा चंदेल यांच्या नेतृत्वाखाली माधुरी चौधरी, लताबाई सहारे, रमशीला गुवाल, रजनी शाह, उषा जांभळे, मेना कपुरेडिया, गौरी कपुरे, इंदिरा कपुरेडिया, बेरा नेताम, नंदेश्वरी सहाळा, तिजिया दूधमोगरा, मोहन सहाळा, कुंभकर्ण डोंगरी, रामप्रसाद सिंगारे, भजन तसेच इतर पदाधिकारी व कार्यकर्ते उपस्थित होते.
युवती सेनेने प्रशासनाने या मागणीची तातडीने दखल घेऊन विशेष शिबिराचे आयोजन करावे, जेणेकरून वारसांची नावे वेळेत नोंदवून लाभार्थ्यांची गैरसोय दूर होईल, अशी अपेक्षा व्यक्त केली आहे.
