परभणी (Fire Incident) : परभणी शहरातील खंडोबा बाजार परिसरात भरदिवसा उभ्या असलेल्या टेम्पोला अचानक आग लागल्याने टेम्पोतील तीन जनावरे होरपळून मयत झाल्याची दुर्दैवी घटना घडली. या आगीत वाहनाचेही मोठे नुकसान झाले आहे. ही घटना शनिवार, १६ मे रोजी दुपारी अडीचच्या सुमारास घडली.
मिळालेल्या माहितीनुसार, खंडोबा बाजार येथे उभ्या असलेल्या टेम्पोला आग लागल्याची माहिती मनपा सदस्य गुलमीर खान यांनी अग्निशमन दलाला दिली. माहिती मिळताच अग्निशमन दलाचे दिपक कानोडे, रोहित गायकवाड, उमेश कदम आणि संतोष मुदीराज यांनी तत्काळ घटनास्थळी धाव घेतली.
टेम्पोमध्ये म्हशीचे तीन वघारू होते. आग लागल्यानंतर या तिन्ही जनावरांचा होरपळून मृत्यू झाला. तसेच टेम्पोचेही मोठ्या प्रमाणावर नुकसान झाले आहे. आग नेमकी कशामुळे लागली याचे कारण अद्याप स्पष्ट झालेले नाही.
दरम्यान, मे महिन्याच्या सुरुवातीपासून जिल्ह्यात उष्णतेची तीव्र लाट जाणवत असून, वाढत्या तापमानामुळे वाहनांना आग लागण्याच्या घटनांमध्ये वाढ होत असल्याचे दिसून येत आहे. काही दिवसांपूर्वीच ताडबोरगावजवळ चारचाकी वाहनाला आग लागल्याची घटना घडली होती.
