कळमनुरी (Fire Incident) : कळमनुरी–हिंगोली–नांदेड मुख्य रस्त्यावर तोष्णीवाल मंगल कार्यालयासमोर असलेल्या एका सिमेंट दुकानात उभ्या असलेल्या ट्रकला 28 मार्च रोजी दुपारी साडेतीन वाजण्याच्या सुमारास अचानक आग लागली. या आगीत ट्रकची केबिन पूर्णपणे जळून खाक झाली असून, सुदैवाने कोणतीही जीवितहानी झाली नाही.
घटनेनंतर परिसरात एकच खळबळ उडाली. आग वाढत असल्याचे लक्षात येताच तत्काळ अग्निशामक दलाला फोन करून पाचारण करण्यात आले. अग्निशामक दलाच्या मदतीने आग आटोक्यात आणण्यात यश आले. दरम्यान, आग विझविण्यासाठी स्थानिक नागरिकांनीही पुढाकार घेतला. विनोद बांगर, राहुल इंगळे, जाधव, काळे, हारण आदींनी आग नियंत्रणात आणण्यासाठी प्रयत्न केले. वेळीच आग नियंत्रणात आल्यामुळे मोठे नुकसान टळले असले, तरी आगीचे नेमके कारण अद्याप अस्पष्ट आहे.
