शेंदुरजना आढाव येथील प्रकारावर शेतकऱ्यांचा आरोप; चौकशीची मागणी
मानोरा : तालुक्यातील शेंदुरजना आढाव येथील पेट्रोल पंपावर डिझेल वितरण करताना काही वाहनधारकांना प्राधान्य दिले जात असल्याचा आरोप शेतकरी व सामाजिक कार्यकर्त्यांकडून करण्यात येत आहे. डिझेलसाठी लांबून आलेल्या अनेक शेतकऱ्यांना “डिझेल संपले” असे सांगून परत पाठविण्यात आल्याची तक्रार समोर आली आहे.
संपूर्ण जिल्ह्यात डिझेल टंचाई निर्माण झाल्यामुळे पेट्रोल पंपांवर शुकशुकाट दिसून येत आहे. काही पंपांवर डिझेल आले की काही तासांतच संपत असून ‘नो स्टॉक’चा फलक लागतो. अशा परिस्थितीत बुधवारी शेंदुरजना आढाव येथील पंपावर डिझेल उपलब्ध झाले असता वितरणात दुजाभाव करण्यात आल्याचा आरोप करण्यात आला आहे.
शेतकऱ्यांच्या म्हणण्यानुसार, काही शेतकऱ्यांना परत पाठवल्यानंतर थांबलेल्या काही वाहनचालकांना मात्र डिझेल देण्यात आले. याबाबत प्रहारचे चेतन पवार यांनी आरोप करताना पंपावर काळाबाजार सुरू असल्याची शक्यता व्यक्त केली आहे.
सध्या शेतीच्या कामांचा हंगाम सुरू असल्याने डिझेलची मागणी मोठ्या प्रमाणात वाढली आहे. अशा परिस्थितीत शेतकऱ्यांना डिझेलसाठी ताटकळत राहावे लागत असल्याने तीव्र संताप व्यक्त केला जात आहे.
या प्रकरणाची संबंधित प्रशासनाने तात्काळ चौकशी करून डिझेल वितरण पारदर्शक पद्धतीने करण्याची मागणी शेतकऱ्यांकडून करण्यात येत आहे.
