पल्लवी बहिरम आणि अरुण चौरे यांचा मृत्यू; प्रेमसंबंधाची शक्यता, नेमके कारण शोधण्यासाठी पोलिसांचा तपास सुरू
धुळे जिल्ह्यातील साक्री तालुक्यात दोन तरुणांचे मृतदेह एकाच ठिकाणी आढळून आल्याने शिवाऱ्या डोंगर परिसरात मोठी खळबळ उडाली आहे. शेंदवड परिसरातील या घटनेत १८ वर्षीय पल्लवी बहिरम आणि २३ वर्षीय अरुण चौरे यांचा मृत्यू झाला आहे. प्राथमिक माहितीनुसार, दोघांमध्ये प्रेमसंबंध असल्याची शक्यता व्यक्त केली जात असून त्यातूनच ही घटना घडली असावी, असा पोलिसांचा प्राथमिक अंदाज आहे. मात्र, मृत्यूमागील नेमके कारण अद्याप स्पष्ट झालेले नाही.
मिळालेल्या माहितीनुसार, पल्लवीने रात्री कुटुंबीयांसोबत जेवण केल्यानंतर घरात झोप घेतली होती. सकाळी ती घरात आढळून न आल्याने कुटुंबीयांनी तिचा शोध सुरू केला. दरम्यान, अरुणने मध्यरात्री एका व्यक्तीला संदेश पाठविल्याची माहिती समोर आली. या धाग्याच्या आधारे नातेवाईक आणि ग्रामस्थांनी शिवाऱ्या डोंगर परिसरात शोध घेण्यास सुरुवात केली.
शोधमोहीम सुरू असताना दोघेही गंभीर अवस्थेत आढळून आले. घटनेची माहिती मिळताच पिंपळनेर पोलिसांचे पथक घटनास्थळी पोहोचले. पोलिसांनी दोघांना तातडीने ग्रामीण रुग्णालय, पिंपळनेर येथे नेले. मात्र, वैद्यकीय तपासणीनंतर डॉक्टरांनी दोघांनाही मृत घोषित केले.
दोन्ही मृतदेह शवविच्छेदनासाठी ग्रामीण रुग्णालयाच्या शवागारात ठेवण्यात आले आहेत. दरम्यान, या घटनेमागे नेमकी कोणती परिस्थिती होती, याचा तपास पोलिसांकडून करण्यात येत आहे. घटनास्थळाचा पंचनामा, संबंधित व्यक्तींचे जबाब तसेच उपलब्ध पुरावे यांचा आधार घेत तपासाची दिशा निश्चित केली जात आहे. शवविच्छेदन अहवाल प्राप्त झाल्यानंतर मृत्यूचे नेमके कारण स्पष्ट होण्याची शक्यता आहे.
