संग्रामपूर तालुक्यातील घटना; स्वतःच्या शेतात घेतले टोकाचे पाऊल, पोलिसांकडून तपास सुरू
बुलढाणा : संग्रामपूर तालुक्यातील करमोडा ग्रामपंचायतीचे विद्यमान लोकनियुक्त सरपंच दीपक प्रकाश उगले यांच्या मृत्यूने परिसरात खळबळ उडाली आहे. दीपक उगले यांनी स्वतःच्या शेतात टोकाचे पाऊल उचलल्याची माहिती आहे. या घटनेपूर्वी त्यांनी समाजमाध्यमांवर एक व्हिडीओ प्रसारित केल्याचे सांगितले जात असून, त्यात राजकीय विरोधकांकडून मिळणाऱ्या धमक्या आणि त्रासाला कंटाळल्याचा दावा केल्याची माहिती समोर आली आहे.
दीपक उगले यांनी मृत्यूपूर्वी तयार केलेल्या या व्हिडीओमुळे प्रकरणाला वेगळे वळण मिळाले आहे. राजकीय विरोधकांकडून नेमक्या कोणत्या प्रकारच्या धमक्या देण्यात आल्या होत्या, त्यांना कोणत्या स्वरूपाचा त्रास सहन करावा लागत होता आणि त्यांच्या या टोकाच्या निर्णयामागील नेमके कारण काय होते, याबाबत आता पोलिसांकडून तपास केला जाणार आहे.
घटनेची माहिती मिळताच पोलिसांनी घटनास्थळी धाव घेत पाहणी केली. त्यानंतर आवश्यक कायदेशीर प्रक्रिया सुरू करण्यात आली आहे. मृत्यूपूर्वीचा व्हिडीओ तसेच त्यामध्ये करण्यात आलेले आरोप तपासाच्या दृष्टीने महत्त्वाचे ठरण्याची शक्यता आहे.
दीपक प्रकाश उगले हे करमोडा ग्रामपंचायतीचे विद्यमान लोकनियुक्त सरपंच होते. त्यांच्या अचानक झालेल्या मृत्यूची माहिती समोर आल्यानंतर ग्रामस्थ आणि संग्रामपूर परिसरातील नागरिकांमध्ये हळहळ व्यक्त होत आहे. या घटनेमुळे तालुक्यातील राजकीय आणि सामाजिक वर्तुळातही चर्चेला उधाण आले असून, पोलिसांच्या तपासानंतर या प्रकरणामागील अधिकृत कारण आणि इतर बाबी स्पष्ट होण्याची शक्यता आहे.
