कळमनुरी (Dead Body Found) : शिवरातील देवदरी शिवार परिसरातील स्वतःच्या शेताच्या आखाड्यावर शहरातील बंडू अप्पा पंचलिंगे या वयोवृद्धाचा १७ मे रोजी मृतदेह आढळून आला.
याबाबत माहिती अशी की, शहरातील तांबोळी गल्ली येथील रहिवासी बंडू अप्पा पंचलिंगे (वय ६५) हे देवदरी शिवारात असलेल्या आपल्या शेतात राहत असत. १७ मे रोजी सकाळी त्यांचा मुलगा शेतात पोहोचला असता, आखाड्यावर आपल्या वडिलांचा मृतदेह आढळून आला.
त्यांनी तत्काळ कळमनुरी पोलिसांना खबर दिली. सपोनि रघुनाथ शेवाळे, पो. उपनि. संतोष इंगळे, सतीश ठेंगे, पोलीस कर्मचारी कानबाराव हराळ, शकुराव बेले, अरविंद राठोड हे घटनास्थळी पोहोचले. तसेच पोलिस अधीक्षक निलाभ रोहन व पोलीस उप अधीक्षक कुंदन कुमार वाघमारे यांनीही घटनास्थळी भेट दिली.
मृतदेह शवविच्छेदनासाठी कळमनुरी उपजिल्हा रुग्णालयात पाठवण्यात आला असून पुढील तपास कळमनुरी पोलीस करत आहेत. सदर मृतदेह आढळून आल्याने शहरात खळबळ उडाली असून संबंधित वृद्धाचा मृत्यू आकस्मिक की घातपात, याबाबत चर्चा सुरू आहे.
