बुलढाणा : गुरुवारी बुलढाणा जिल्ह्यात घडलेल्या तीन वेगवेगळ्या हृदयद्रावक घटनांनी संपूर्ण जिल्हा हादरला आहे. दोन ठिकाणी कौटुंबिक वादातून महिलांची निर्घृण हत्या करण्यात आली, तर एका भीषण अपघातात दोन वॉचमनचा जागीच मृत्यू झाला. सलग घडलेल्या या घटनांमुळे जिल्हाभरात भीती आणि शोककळा पसरली आहे.
खामगावात पतीकडून पत्नीची निर्घृण हत्या
खामगाव शहरात घरगुती वादातून संतप्त झालेल्या पतीने पत्नीवर लोखंडी रॉडने हल्ला करत तिची निर्घृण हत्या केल्याची धक्कादायक घटना घडली. सविता प्रकाश सोळंके असे मृत महिलेचे नाव आहे. आरोपी पती प्रकाश सोळंके याने तिच्या चेहऱ्यावर आणि डोक्यावर सपासप वार केले. या हल्ल्यात ती गंभीर जखमी होऊन जागीच मृत्यूमुखी पडली. घटनेनंतर परिसरात एकच खळबळ उडाली. पोलिसांनी तात्काळ कारवाई करत आरोपीला अटक केली असून पुढील तपास सुरू आहे.
भेंडवळमध्ये कुऱ्हाडीने वार करून पत्नीचा खून
दुसरी धक्कादायक घटना जळगाव जामोद तालुक्यातील भेंडवळ येथे घडली. येथेही कौटुंबिक वादातून पतीने पत्नी माया भारसाकडे हिच्यावर कुऱ्हाडीने सपासप वार करत तिचा खून केला. हल्ला इतका गंभीर होता की तिचा जागीच मृत्यू झाला. या घटनेने परिसरात भीतीचे वातावरण निर्माण झाले असून पोलिसांनी आरोपीला ताब्यात घेऊन तपास सुरू केला आहे.
खामगावात भरधाव कारची धडक; दोन वॉचमन ठार
दरम्यान, तिसऱ्या घटनेत खामगावातील नांदुरा रोडवरील पुष्पांजली हॉटेलसमोर भरधाव कारने दोन वॉचमनना जोरदार धडक दिली. या भीषण अपघातात गोविंद शेगोकार आणि विवेक पायघन या दोघांचा जागीच मृत्यू झाला. अपघात इतका गंभीर होता की घटनास्थळीच दोघांनी प्राण गमावले. या घटनेमुळे काही काळ परिसरात तणावाचे वातावरण निर्माण झाले होते.
जिल्हाभरात हळहळ आणि भीतीचे वातावरण
एका दिवसात सलग तीन गंभीर घटना घडल्यामुळे बुलढाणा जिल्हा अक्षरशः हादरला आहे. नागरिकांमध्ये भीतीचे वातावरण पसरले असून मृतांच्या कुटुंबियांवर दुःखाचा डोंगर कोसळला आहे. तिन्ही प्रकरणांचा पोलिसांकडून सखोल तपास सुरू आहे.
