रामचंद्र लेनमधील स्टोअरमध्ये स्वच्छतेच्या नियमांचे उल्लंघन; FDAच्या कारवाईत हजारो रुपयांचा खाद्यसाठा जप्त, डेअरी उत्पादनांविरोधातही विशेष मोहीम
मुंबई : क्विक-कॉमर्स क्षेत्रातील प्रमुख प्लॅटफॉर्मपैकी एक असलेल्या Blinkitच्या मालाड पश्चिम येथील डार्क स्टोअरविरोधात महाराष्ट्र अन्न व औषध प्रशासनाने (FDA) कठोर कारवाई केली आहे. तपासणीदरम्यान स्टोअरमध्ये झुरळांचा प्रादुर्भाव, कालबाह्य खाद्यपदार्थांचा साठा आणि स्वच्छतेशी संबंधित गंभीर त्रुटी आढळल्याचा दावा FDAने केला आहे. या पार्श्वभूमीवर संबंधित स्टोअरचे फूड लायसन्स निलंबित करण्यात आले आहे.
मालाड पश्चिमेतील रामचंद्र लेन परिसरातील या स्टोअरची FDAच्या अधिकाऱ्यांनी ऑगस्टमध्ये तपासणी केली होती. पाहणीदरम्यान फळे आणि भाज्या ठेवलेल्या ठिकाणी झुरळे आढळल्याचे विभागाकडून सांगण्यात आले. त्याचबरोबर परिसरातील स्वच्छतेची स्थिती समाधानकारक नसल्याचेही निरीक्षण नोंदवण्यात आले.
FDAच्या कारवाईनंतर संबंधित परवान्याच्या निलंबनाच्या कालावधीत या स्टोअरमधून खाद्यपदार्थांची विक्री, वितरण किंवा खाद्य व्यवसायाशी संबंधित व्यवहार करण्यास बंदी घालण्यात आली आहे. मात्र, ही कारवाई केवळ मालाडमधील संबंधित स्टोअरपुरती मर्यादित असल्याचे FDAने स्पष्ट केले आहे. त्यामुळे Blinkitच्या संपूर्ण खाद्य व्यवसायाचे किंवा सर्व स्टोअर्सचे परवाने निलंबित करण्यात आलेले नाहीत.
दरम्यान, महाराष्ट्र FDAकडून खाद्यपदार्थांच्या दर्जाबाबत आणि स्वच्छतेच्या नियमांबाबत विविध आस्थापनांवर तपासणीची मोहीम सुरू आहे. मोठ्या ब्रँड्स, हॉटेल्स तसेच फूड स्टोअर्सची तपासणी करण्यात येत असून, जमा झालेल्या खाद्य नमुन्यांची संख्या मोठी असल्याने त्यांच्या तपासणीसाठी अधिकारी रविवारीही काम करत असल्याची माहिती समोर आली आहे.
बुलढाण्यात रिलायन्सच्या आउटलेटवरही तपासणी
FDAच्या या कारवाईच्या मालिकेत ८ ऑगस्ट रोजी बुलढाणा येथील ARD सिनेमॉलमधील रिलायन्सच्या रिटेल आउटलेटचीही तपासणी करण्यात आली. एका विशिष्ट ब्रँडच्या काजू कतलीमध्ये बुरशी आणि जिवंत किडे आढळल्याची तक्रार मिळाल्यानंतर ही कारवाई करण्यात आली होती.
तपासणीदरम्यान त्याच प्रकारच्या दुसऱ्या बॅचमधील ११.३४ किलो काजू कतली, ज्याची किंमत १०,२३८ रुपये आहे, FDAच्या अधिकाऱ्यांनी जप्त केली. या खाद्यपदार्थांचे नमुने पुढील तपासणीसाठी प्रयोगशाळेत पाठवण्यात आले आहेत.
डेअरी उत्पादनांविरोधातही विशेष मोहीम
दूध आणि विविध डेअरी उत्पादनांमध्ये होणाऱ्या भेसळीविरोधातही FDAने विशेष अभियान सुरू केले आहे. या मोहिमेदरम्यान आतापर्यंत १४,३७८ लीटर डेअरी प्रोडक्ट्स जप्त करण्यात आले असून, या जप्त साठ्याची एकूण किंमत ९३.२६ लाख रुपये असल्याची माहिती देण्यात आली आहे.
यापूर्वी FDAने भिवंडीतील Amazonच्या वेअरहाऊसवरही कारवाई करत तपासणी केली होती. या प्रकरणाशी संबंधित कायदेशीर बाब सध्या मुंबई उच्च न्यायालयात सुरू आहे.
दरम्यान, मुंबईत IAS अधिकारी तुकाराम मुंडे यांच्या कारवाईच्या पार्श्वभूमीवर FDAच्या अन्नसुरक्षा तपासण्यांकडे विशेष लक्ष वेधले जात आहे. खाद्यपदार्थांच्या साठवणुकीपासून स्वच्छता आणि विक्रीपर्यंतच्या नियमांचे पालन होत आहे की नाही, याची तपासणी करण्यासाठी विभागाकडून कारवाईचा वेग वाढवण्यात आला आहे.
