भडगाव : जळगाव जिल्ह्यातील भडगाव परिसरात अवघ्या 800 रुपयांच्या पैशांच्या वादातून तरुणाची हत्या झाल्याची धक्कादायक घटना समोर आली आहे. धर्मा जुगा पवार असे मृत तरुणाचे नाव असून, जुगा कांतिलाल पवार हा या प्रकरणातील संशयित आरोपी आहे. भडगाव पोलिसांनी आरोपीला ताब्यात घेतले असून, या घटनेचा पुढील तपास सुरू आहे.
धर्मा पवार आणि जुगा पवार हे दोघेही गावोगावी फिरून बनावट रुद्राक्ष विक्रीचे काम करत होते. घटनेच्या दिवशी धर्मा याने 800 रुपयांचे रुद्राक्ष विकले होते. त्यानंतर सायंकाळी साडेसात ते आठच्या सुमारास दोघे भडगाव स्टेशन परिसरात दारू पिण्यासाठी बसले. यावेळी रुद्राक्ष विक्रीतून मिळालेल्या 800 रुपयांच्या वाटपावरून दोघांमध्ये वाद झाला.
पैशांवरून सुरू झालेला वाद वाढल्यानंतर जुगा पवार याने जवळ पडलेल्या दगडाने धर्मा पवार याच्यावर हल्ला केल्याचा पोलिसांचा आरोप आहे. या घटनेत धर्मा याचा मृत्यू झाला.
आरोपी शेतात आढळला
घटनेची माहिती मिळताच भडगाव पोलिसांचे पथक घटनास्थळी पोहोचले. जवळच्या शेतातून कुत्रे भुंकत असल्याचा आवाज येत असल्याने पोलिसांनी त्या परिसरात शोध घेतला. त्यावेळी आरोपी जुगा पवार हा दारूच्या नशेत शेतात बसलेला आढळून आला.
पोलिसांनी आरोपीची बॅग तपासली असता त्यामध्ये मृत धर्मा पवार याचे दात आणि खाण्यासाठी ठेवलेली दोन जिवंत कबुतरे आढळून आली. या प्रकारामुळे तपास पथकाला धक्का बसला. पोलिसांनी आरोपीला तात्काळ ताब्यात घेतले.
या प्रकरणी भडगाव पोलीस ठाण्यात गुन्हा दाखल करण्यात आला असून, घटनेमागील परिस्थिती आणि इतर बाबींचा तपास पोलिसांकडून सुरू आहे.
