रस्ते, पाणी, शिक्षण, आरोग्य आदी मूलभूत समस्यांसाठी शासन दरबारी पाठपुरावा करणार; ना. संजय राठोड यांचे आवाहन
समाजबांधवांनी नोंदणी करून सहभागी व्हावे!
मानोरा (Minister Sanjay Rathod) : बंजारा समाजाला एकत्र, सक्षम व संघटित करण्यासाठी "बंजारा विरासत संघ" या सामाजिक संस्थेमार्फत विविध सामाजिक उपक्रम राबविण्यात येणार आहेत. तांड्यातील व परिसरातील मूलभूत सुविधांच्या प्रश्नांसाठी संघ शासन दरबारी पाठपुरावा करणार असल्याने संपूर्ण राज्यातील गोर बंजारा समाज बांधवांनी सहभागी व्हावे, असे आवाहन संघाचे मुख्य संयोजक तथा मृद व जलसंधारण मंत्री ना. संजय राठोड (Sanjay Rathod) यांनी केले आहे.
बंजारा विरासत संघाचा मुख्य उद्देश तांड्यातील व परिसरातील रस्ते, पाणी, दवाखाना, स्मशानभूमी, शाळा, वीज, शेतरस्ते, नाला खोलीकरण आदी मूलभूत समस्यांची माहिती गोळा करून त्या शासन दरबारी मांडून सोडविण्यासाठी प्रयत्न करणे हा आहे. "बंजारा समाजाच्या सर्वांगीण विकासासाठी प्रत्येकाला एकत्र येणे गरजेचे आहे. राष्ट्रीय, राज्यस्तरीय नेत्यांशी समन्वय साधून शासकीय योजना, सुविधांचा लाभ समाजातील प्रत्येक घटकापर्यंत पोहोचवण्यासाठी संघ काम करेल. तसेच सद्यस्थितीतील लोकसंख्या, उपलब्ध शासकीय योजना यांचा तुलनात्मक अभ्यासही केला जाणार आहे."
संघातर्फे समाजबांधवांची नोंदणी विकसित केलेल्या मोबाईल क्रमांकावर मिस कॉल करून करता येईल. तसेच संघाने प्रसारीत केलेल्या संकेतस्थळावर किंवा क्यू आर कोड स्कॅन करूनही नोंदणी करता येणार आहे. बंजारा समाजाच्या सर्वांगीण विकासासाठी प्रत्येकाने पुढाकार घेऊन एकजूट दाखवावी आणि जास्तीत जास्त नोंदणी करून सहभागी व्हावे, असे आवाहन ना . राठोड करणार केले आहे. यावेळी त्यांच्या समवेत इंदल भोला राठोड व डी डी राठोड यांची उपस्थिती होती.
