औंढा ना. - परभणी मार्गावर गुंडा पाटी जवळील घटना
हट्टा (Andhra Pradesh Devotees Death) : औंढा नागनाथ ते परभणी मार्गावर गुंडा पाटीनजीक भरधाव वाहनाच्या धडकेने आंध्र प्रदेशातील एका भाविकाचा मृत्यू झाला. या प्रकरणी हट्टा पोलिस ठाण्यात २२ एप्रिलला गुन्हा दाखल करण्यात आला आहे.
याबाबत पोलिस सुत्रांनी दिलेली माहिती अशी की, आंध्र प्रदेशातील (Andhra Pradesh Devotees Death) काही भाविक एका टूर्स अ‍ॅन्ड ट्रॅव्हर्ल्स कंपनीव्दारे १२ ज्योर्तिलिंगाच्या दर्शनाकरीता मागील काही दिवसापूर्वी निघाले होते. या भाविकांनी उज्जैन, प्रयागराज यासह इतर देवस्थानाचे दर्शन घेऊन २१ एप्रिल रोजी मंगळवारी श्रीक्षेत्र औंढा नागनाथाचे दर्शन रात्रीच्या वेळी घेतले. यानंतर हे भाविक परळी वैजनाथकडे निघाले होते. २२ एप्रिलला रात्र झाल्याने त्यांनी वसमत तालुक्यातील गुंडा शिवारात मुक्काम ठोकला. बुधवारी पहाटेच्या सुमारास व्यंकटेश्वरा नागनाथ गच्चे (६२) रुद्रपेठ बायपास, अनंतपुर (आंध्र प्रदेश) हे लघुशंकेकरीता उठले असता रस्ता ओलांडत असताना भरधाव वेगाने जाणार्‍या वाहनाने त्यांना धडक दिली.
यामध्ये ते गंभीररित्या जखमी झाले. अपघाताची माहिती हट्टा ठाण्याचे सहाय्यक पोलिस निरीक्षक संग्राम जाधव यांना मिळताच त्यांनी पथकासह घटनास्थळी धाव घेतली. जखमी व्यंकटेश्वरा यांना हट्टा प्राथमिक आरोग्य केंद्रात दाखल करण्यात आले. डॉक्टरांनी तपासणी केल्यावर त्यांना मृत घोषित केले. या प्रकरणी हट्टा पोलिसात प्रकाश एकबोटे यांच्या फिर्यादीवरून अज्ञात वाहन चालकावर गुन्हा नोंदविण्यात आला. पुढील तपास पोउपनि युवराज गवळी हे करीत आहेत.
