अकोला : सिव्हिल लाइन पोलीस ठाणे हद्दीत ब्लॅकमेलिंग, मारहाण व लूटमारीचा धक्कादायक प्रकार उघडकीस आला असून, पोलिसांनी तिघा आरोपींना अटक केली आहे. या घटनेमुळे परिसरात खळबळ उडाली आहे.
मिळालेल्या माहितीनुसार, सुनील पांडुरंग खेडकर (वय 54, रा. दालफैल, खामगाव, जि. बुलढाणा) यांनी दिलेल्या फिर्यादीवरून सिव्हिल लाइन पोलीस ठाण्यात भारतीय न्याय संहिता कलम 309(4), 308(2), 115(2), 351(2), 352, 3(5) अन्वये गुन्हा दाखल करण्यात आला आहे. ही घटना 3 एप्रिल रोजी सायंकाळी सुमारे 6.30 वाजता घडली.
फिर्यादीस एका महिलेने फोन करून बोलावले. त्यानंतर त्यांना चारचाकी वाहनातून घुसर रोडवरील शौर्यवाडा हॉटेल येथे नेण्यात आले. तेथे एक पुरुष व एक वृद्ध महिला येऊन संबंधित महिला ही पत्नी व वृद्ध महिला सासू असल्याचा बनाव करण्यात आला. त्यानंतर फिर्यादीस शेतात नेऊन जबरदस्तीने कपडे काढून महिलेसोबत फोटो व व्हिडिओ काढण्यात आले.
यानंतर आरोपींनी फिर्यादीस मारहाण करून शिवीगाळ केली व त्यांच्या हातातील सुमारे 7 ग्रॅम वजनाची, अंदाजे 35 हजार रुपये किमतीची सोन्याची अंगठी हिसकावून घेतली.
या प्रकरणी पोलिसांनी गोपनीय व तांत्रिक माहितीच्या आधारे नितेश प्रभाकर थोप (40), लता नितेश थोप (35), दोघे रा. खरब ढोरे, ता. मूर्तिजापूर आणि लीलाबाई वसंतराव पाखरे (66), रा. संजय नगर, मोठी उमरी, अकोला यांना ताब्यात घेऊन अटक केली आहे.
ही कारवाई पोलीस अधीक्षक अर्चित चांडक, अप्पर पोलीस अधीक्षक रेड्डी, उपविभागीय पोलीस अधिकारी सुदर्शन पाटील यांच्या मार्गदर्शनाखाली पोलीस निरीक्षक मालती कायटे यांच्या आदेशानुसार पीएसआय शामली निकम व त्यांच्या पथकाने केली.
