Unique Identification Authority of India अर्थात UIDAI ने सध्याचे M-Aadhaar ॲप लवकरच बंद करण्यात येणार असल्याची घोषणा केली आहे. त्याऐवजी वापरकर्त्यांना नव्याने सुरू करण्यात आलेल्या Aadhaar App वर स्थलांतरित होण्याचे निर्देश देण्यात आले आहेत. या नव्या ॲपमध्ये QR-आधारित आधार शेअरिंग, फेस ऑथेंटिकेशन, ऑफलाइन व्हेरिफिकेशन, बायोमेट्रिक लॉक- अनलॉक नियंत्रण आणि अधिक सुरक्षित गोपनीयता पर्यायांचा समावेश करण्यात आला आहे.
UIDAI च्या माहितीनुसार, M-Aadhaar वापरणाऱ्या नागरिकांची माहिती नवीन ॲपमध्ये आपोआप हस्तांतरित होणार नाही. त्यामुळे वापरकर्त्यांना नवीन Aadhaar App डाउनलोड केल्यानंतर आपले आधार प्रोफाइल पुन्हा तयार करावे लागणार आहे.
The #mAadhaar App is retiring soon. Now experience a smarter, faster, and more secure digital journey with the new #AadhaarApp. From secure QR-based #Aadhaar sharing to enhanced privacy controls and seamless access to Aadhaar services — the new app is designed to make your… pic.twitter.com/snfeUx4Rgr
— Aadhaar (@UIDAI) May 15, 2026
नवीन ॲप डाउनलोड करण्यासाठी वापरकर्ते अधिकृत Android किंवा iOS ॲप स्टोअरचा वापर करू शकतात. इंस्टॉलेशननंतर आधारशी लिंक असलेला मोबाईल नंबर टाकून OTP व्हेरिफिकेशन करावे लागेल. काही प्रकरणांमध्ये फेस ऑथेंटिकेशनची अतिरिक्त पडताळणीही केली जाऊ शकते.
लॉगिन झाल्यानंतर वापरकर्त्यांना सुरक्षा PIN तयार करावा लागेल किंवा फिंगरप्रिंट व फेस अनलॉक सक्षम करावे लागेल. त्यानंतर आधार क्रमांक टाकून आणखी एक OTP पडताळणी पूर्ण करून प्रोफाइल मॅन्युअली जोडावे लागेल.
UIDAI ने स्पष्ट केले की, एकाच मोबाईल नंबरवर आधारित अनेक आधार प्रोफाइल एका डिव्हाइसवर जोडता येणार आहेत. त्यामुळे कुटुंबातील सदस्यांना एकाच ॲपमधून आधार सेवा व्यवस्थापित करणे अधिक सोपे होणार आहे.
नवीन Aadhaar App मध्ये सुरक्षित QR-आधारित आधार शेअरिंग सुविधा देण्यात आली आहे. त्यामुळे आधार कार्डची छायाप्रत देण्याऐवजी डिजिटल पद्धतीने ओळख पडताळणी करता येणार आहे. तसेच ऑफलाइन आधार पडताळणी, ऑथेंटिकेशन हिस्ट्री ट्रॅकिंग आणि स्मार्टफोनवरून थेट बायोमेट्रिक लॉक- अनलॉक नियंत्रण यांसारख्या सुविधा देखील उपलब्ध करण्यात आल्या आहेत.
UIDAI च्या मते, नव्या Aadhaar App चा उद्देश ओळख पडताळणी प्रक्रिया अधिक सुरक्षित, जलद आणि वापरकर्ता अनुकूल बनवणे हा आहे. M-Aadhaar प्लॅटफॉर्म बंद होण्यापूर्वी नागरिकांनी नवीन ॲपवर स्थलांतर पूर्ण करावे, असे आवाहनही करण्यात आले आहे.
